Bhurgim zaun asat avoi-bapaichea mogachi ani ekvottachi khunna. Avoi- bapaichem rogot hea bhurgeant asta. Jednam ek bhurgem hea sonvsaracho uzvadd polleta, tednam avoi-bapaichea kallzant khuxalkayechi zor vhanvta. Jednam hem bhurgem sonvsarak dolle dhampta tednam tich khuxalkayechi zhor dukhanchi ani vilapanchi zhor zata. Oslich zhor Judev avoi-bapain vhanvoili jednam Herod razan aplem rajponn samballunk tanchea supurlea bhurgeanche rogtache vall kele. (Mt 2, 16)
Hea inocent Ballancho Povitr Sobha Dezembrache 28ver, ugdass korta kiteak hea supurlea bhurgeamnim, Jezu pasot aplem rogot varoilem ani aplea rogtantlean tannim Jezuk govai dilo. Him bhurgim zalim Jezu pasot poilim rogt-sakxim. Tanchem rogot Jezun Aplea povitr rogtan duvun kaddlem. Hea bhurgeamchem rogot Jezu pasot varovlem punn Jezun somestam pasot aplem rogot varoilem.
Hea innocent ballachem rogot aiz amkam Jezu pasot ani Jezuk govai diunk ulo korta. Punn aicho somaz oslea oguneakari bhurgeank aplea kusveantuch martat. Aple khuxalkaye ani patok lipovche axen kusveantuch sasnik nid nidoitat. Chintop vegllem punn kortub Ferod razachem. Jezuchea zolmant sonvsaracho uzvadd fanklo, kiteak Jezu zaun asa to uzvadd (Ju 8,12). Jezun bhurgeank vengent gheun tancher axirvad ghatlo (Mk 10,16) kiteak oslinch bhurgim tache pasot aplem rogot varovn melim. Tor bhurgeak mogan vengounk, tancher zatoli onit ani ot’teachear pois korunk ani tanche hok’kh rakhunk, amkam Jezucho ani supurl’lea bhurgeancho ulo. Ulo tancho aikum-ia, Jezuk govai dium-ia, kiteak govai diunk hanv ani tum zolmola.
Fr. Leslie Gomes