Mogall Firgozkaramno,
Fr. Stan Swamy (sarkhem nanv Fr. Stanislaus Lourduswamy) July-ache 5ver 2021, Mumbai hospitalant hea sonvsarak ontorlo. Tacho zolm 26ver April, 1937 hea vorsa Viragalur, Tamil Nadu zal’lo. 1957 vorsa to Jesuit sounstent bhitor sorlo ani aplem gorjechem xikop zalea uprant padriponnachi makhnni ghetli. Tea uprant tannem unchlem somajik xikop Phillipines ani Belgium korun degree ghetleo. Tachea itlea sogott xikpak ani uxearkaiek lagun tannem zaiteo zutt’teo choloileo. Punn tachea khasgi umedik lagun tannem Tribals ani Dalits heam durboll lokam modem Jharkhand aplo chodd vavr korunk tharailem. Tea lokache zaite hok samballunk to bharim vavurlo ani zaiteo sovloteo tankam adkollim modem jikhun ghetleo. Zaitea gorib lokak ekthaim kele ani tanche modem zagrutai haddli. Haka lagun Fr. Stan Swamy ek Industrialist ani serkari mon’xancho dusman zaun poddlo.
Fr. Stan Swamy-k goreak sampddaunk, Bhima-Khoreganv zalole chollvollint tacho hat asa ani Maoist hancho to ek bhageli mhonn karann nastanam guneanvkar kelo. Sangtat ki tacho laptop ani mobile phone vhorun “bug” ghalun nasloleo emails asat mhonn sangun 8ver October, 2020 taka Taloja bondkonnint ghalun dovorlo. Bail (zamin) dinastanam bondkonnint tachi bolaiki ibaddun udoili ani xevottak to hea sonvsarak ontorlo.
Mark 6/34 “Jezun lokak dekhlo ani Gonvlli nasloleam xelliam porim aslim dekhun tankam churchurlo ani tankam sobar vostu xikounk laglo”. Jezuchem khorem gonvlliponn hea vollint polleunk mellta. Fr. Stan Swamy-n oslem gonvlliponn aplem kelem. Jharkand ani dusream suvatancher khoro ani boro fuddari nasloleancho usko korun apunn tancho Boro Gonvlli zalo. Tanche pasot taka aplo Borea Gonvllea baxen jiv legun diuncho poddlo.
Aiz-kal Goy-ant ani akhea Bharotant osleam Borea Gonvlleanchi odik ani odik goroz vaddot ghelea. Fuddari zaite asat. Punn soglle bore fuddari oxem nhoim. Somajik fuddari asat ani dhormik-ui gonvlli asat. Zaite pavtt faideak lagun somajik fuddari dhormik vhoddil zaunk sodtat ani dhormik gonvlli gorjek lagun somajik fuddari zaunk poddta. Kitem zaum, tantunt poilem, modem ani xevott zaunk zai – porjechem boreponn.
August-ache 4ter St. Joao Marie Vianney porbe disa Gonvlliancho dis Goy-ant palltat. Tednam soglleam Kristi Padrinim ani mottvaxeanim Jezu sarkhe Bore Gonvlli zaunk amcho-tumcho usko ani magnnem zaum.
Tumcho Padr Vigar
Fr. Andrew Pereira