Mogall Firgozkaramno,
Vhoddlem xem kaim vaitt zainastanam Mai mhoino khoincheanuch ghelo so. Tantunt modem June mhoino ‘New Normal’ mhonn sangun novem Xikxonnik (Academic) voros suru zalem. Tantunt modem Gonvllik (Pastoral) voros-ui suru kelem.
Hea novea Gonvllik vorsak Goy dhormprantant “Mhojea Pattlean Ieiat” (Mk.1/17) ho vixoi ghetla. Hi voll zaite pautt ani zaite baxen ani zaiteam mellaveank ghetloli mellta. Mhaka dista soglleam von chodd vapurloli hi voll asa.
Mark-uchem xubhvortoman suru zatanch, Juanv lokak ani Jezuk bautism dilea uprant rokddich Jezu-cher dixtt voita. Jezu aplo vavr suru korunk poilench doria veller astanam xisank apounk lagta. Veller nistem dhorunk aplim zallam ghaltanam Pedru ani Andre-k mhonnta, “Mhojea Pattlean Ieiat, Hanv tumkam mon’xank dhortat tosle kharvi kortolom.” Hem apounnem kelea uprant anik mukhar vochun Zebedev-achea dog putank tench apounnem korta. Sogllem soddun Te tache pattlean ghele oxem Povitr Pustok mhonnta.
Bautism ghevop ani Kristanv zavop mhollear “Mhojea pattlean ieiat” hea Jezuchea uleak zap divop. Ek pautt bautism gheun kristanv zalo mhonn somponam. Bautism gheun kristanv zavop mhollear ek xevott nhoi, punn ek survat. Tachea (Jezu) pattlean vochop mhollear ek boro mannsugecho bhavarti monis mhonn jievop. Hem korun Jezuchea uleak dor disa porot-porot zap divop. Borea ani vaitta modem, sukha ani dukha modem Jezuche xikovnnek visvaxi ravop. Hem asa Jezuchea uleak zap divop.
Jezuchea sogllea xisanchi moro porian khoraien topasnni keli. Punn te sodanch xevottak zoit zalole mell’le. Amkam Kristi bhavarteank Indiek ani Goy-ant hea kallar xisam bhaxen dor disa topasnni zata. Hea vorsa “Mhoje Pattlean Ieiat” ho vixoi ghetlolo astanam odik choturaien Jezucho ulo aikunk ani nettan tache pattlean vochunk nirnnoi gheum-ia.
Fr. Andrew Pereira
Parish Priest