Tadev: Tuka Dev boro dis dium, Simao Titiv.
Simao: Tukai Dev kurpa dium, Baba Tadev.
Tadev: Kollttam – nam kollttam, khoimcheanuch Dezembracho mhoino suru zalo, nhoim?
Simao: Oi, hea vorsache dis, mhoine veginuch soron gele ani xevottacho mhoino hajir zalo.
Tadev: Khoxalkaiecho ani movjecho mhoino ho kiteak thoddeach disamnim ami Natalanchi Porob vhodda dobajean monoiteleanv.
Simao: Oi Tadev, punn amchim adlim Natalam kai borim zatalim, atamchim tankam sor korunk zainam.
Tadev: Oxem kiteak mhonnttai tum, Titiv?
Simao: Atam-chim Natalam fokot ek dhondo vo vyapar koxim zaleant. Amchea zolmun ietolea Jezuchem kainch disonam.
Tadev: Barik niall kelear, amchi nodor fokot amche bhaile toiarecher asta, nhoim?
Simao: Koxem nhesop, ghor koxem nettovop, Khoslim khannam – pivnnam – mittai toiar korop, khoinchea ‘Dance’-ak vochop, itleacheruch amchim Natalam dhorlolim asat.
Tadev: Zaite pavtti, thoddim bhavam – bhoinnam Natalanchea Misak passun hajir zainastanam ‘Dance’ ani ier kariavollinim bhag gheunk fattim soronant.
Simao: Tea bhair disrim asat, jim Misak ietat, punn bhair ravtat ani favo te porim somorombnnent vantto ghenant.
Tadev: Thoddeank, Misak hajir zavop ek spordha vo ‘fashion parade’ koxi zalea.
Simao: Atam bazarant kosli gordi asteli tem ani sangonk naka – kopdde ani moche, bizlecheo vostu, jevnna-khannacheo toiarecheo vostu, hem ani tem gheunk gordi.
Tadev: Tum mhonnonk sodtai, amchea Somiak ievkar diunk, ami otmik toiari kainch korinanv, oxem nhoim, Titiv?
Simao: Sarkem tujem. Mhaka kitlexech Okristi dondekar bhav mhonnttat tancho vepar-dondo boro zaunk pavta fokot amchea Natalanchea Kharedi vo ‘shopping’- ak lagun.
Tadev: Amche Iadnik bhav, amkam dor vorsa xiddkaitat, punn tanchem konn aikota?
Simao: Eka kanan aikun, dusrea kanantlean tem bhair veta.
Tadev: English bhaxen Natalam mhollear “Christmas” punn zaitim zannam taka “Xmas” mhonnttat tem polloun vaitt dista.
Simao: Hanv tuka hench sangunk sodtam. Natalantlo Jezuk bhair kaddla, tantunt “CHRIST” dixtti poddonam.
Tadev: Mottvea akaran ami ghoddie ‘Xmas’ – oxem boroitanv zait, punn tem chukichem ani ami vaprunk favonam.
Simao: Hem sot ami dusreankui sangchi goroz asa.
Tadev: Hea vorsak tori ek bori otmik toiari korun amchea Ballka Jezuk ievkar diunk ami proitn korum-ia.
Simao: Oxem kelear, amcher Devachem besanv astelem ani ier sogleo vostu bore toren zaunk pavteleo. Borem tor, vetam hanv, adim fuddench tuka ani tujea kuttumbak, khoxalbhorit Natalanchi porob anvddetam.
Tadev: Tumkaim anvddetam, Titiv. Ballka Jezuchim upott besanvam amcher sogleancher denvum
-Felix Dias