Bhavartan ani visvasan kel’lim magnnim amcho mogall Dev aikota ani aikot asa. Devachea nanvan jednam ami ektthaim zatanv, tednam, ami amchea khaltea magnnea sangata, dusreai bhavam- bhoinnam khatir magunk pavtanv ani hem Devak manouta ani him magnnim Dev aikota. Oxench, amchea halinch zal’lea Sant Antonichea Trezen ani Porbe somoiar disun ailem. Thir bhavartan ani umedin, hea Trezen-Porbek, zaito lok ekttovlo ani tannim Sevadhormik ritinim vantto ghetlo. Sant Anton-icho Ters, Sant Anton-icho Kurou, Sant Anton-ichi Ladin ani xekim Povitr Misachi Bhett / Provochon dor disa bhettoili. Xevottak Sant Antonik fuddem ghalun tachem folladik magnnem khaltikaien Devak ubarlem. Kaim khas magnnim zaun aslim: bhurgeachem dennem, gombhir pidda zal’leank pekovnni, bori nokri, ghorant xanti, sandleleo vostu porot mellonk, adi.
Khuxalkaien sangunk dista, zaitim magnnim Devan aikolim ani kitlim-xinch bhavam-bhoinnam Devacho upkar attounk fuddem sorlim. Dhaktteo – vhoddleo milagri Sant Anton-iche mozotin amkam Devan favo keleo.
Amche Iadnik bhav, Fr. Myron Barreto, Fr. Seville Antao, Fr. George Dias, Fr. Jerry Vaz ani Fr. Jose D’Souza, hannim bara dis Mis bhettoun, provochon kelem. Tanchea sangata amcho Padr Vigar, Fr. Andrew Pereira ani Padr Kur Fr. Gregory Cruz asle. Dor disa amche vixoi, amchea dispot’tea jivitacher nodor marunk, amkam prerna ditale – odik korun Jezucho Mog ami koso korcho tem xikoitale. Xekim, Jun-ache 13ver, Porbe disa, Misachi bhett amcho Padr Vigar, Fr. Andrew Pereira, Mukhel Iadnik asun, ghonnghonnan zali. Tachea sangata asle amcho adlo Padr Vigar, Fr. James Torres è Silva ani Raiturche Seminaricho Professor, Fr. Agnelo Pinheiro, zannem provochon kelem. Provochon-antlean, amkam seva-chakri, Sant Anton ani Kristacho Mog sangata zhoddunk, khas somzailem. Zaito lok, ganvcho tosoch soglea lagxilea suatancho, hajir aslo. Devache kurpen, tea disa, pavs naslelean, soglem bore bhaxen zalem ani lok khoxi zalo.
Hea vorsa hem Trezen ani Porob bore bhaxen zaunk zaitim zannam vavurlim ani soglem favo te porim zalem mhonn Devak ami dhinvasum-ia ani Sant Anton-iche mozotin soglim amchim chintlelim Kamam xarti pavoi mhunn magum-ia.
Mog asumdi.
Felix Dias