Devan mhaka rochlem,
Aplea rupachem ani sarkeachem.
Ostori mhaka rochli,
Ani Devak hanv manovlem.
Monxan mhaka aplea monan portun zolman haddlem,
Pordvari, dollddirem mhonn namlekhlem.
Patka rebeant hanv jielem,
Rebeant komoll koxem Jezun mhaka fuloilem.
Fuloil’lem komoll Jezun pisddunk dilem na,
Atam hanv pisddumkui sodina.
Khoro mog-visvaxi ixtt mhaka favlo,
Tachea uzvaddik pavlan kallok palovlo.
Cholun cholun pavli tachea khursa mullim,
Polleun taka bhavna zolli-mollim ximpodlli.
Punorjivont Jezuk hanv poili bhettli,
Mel’lea bhavartak mhojea komri futtli.
Jezu mukhamoll nhoi, kalliz polleta,
Mary Magdalene sorgar Jezuk polleta.
Dekh gheum-ia vhodd bhagevontachi,
Jezuchea uzvaddan pettoi divli jivitachi.
-Fr. Leslie Gomes