Devan amkam zaitench dilam. Dhamun –chepun amchea unttient ghatlam. Dev amche sovem udhar zala toso ami dusream sovem udhar zaunk zai. Devan dilam tatuntlo dhavo vantto ami Devak diuncho mhonn amkam Povitr sobhecho ek nem’ sangta.
Devan amkam jivit dilam: Jezun aplem jivit moniskullache soddvonne pasot bhettoilem. Ami zaite pautti amchech khatir jiyetanv; amchench borem chint’tanv, amchench borem anvddetanv, amchench uloitanv. Hea jivitant amchean dusream pasot zaitem borem korum yetalem. Dusream pasot mhojean kitem borem korum yeta?
Devan amkam girestkayen nettoileant: Adim ghoddiek ami gorib aslim. Amche lagim vhoddlem kainch-xem asunk naslem. Konnem-i tori amkam adhar diun, amchi poristhiti bodol’li. Aiz ami girestkayecher ufetat. Punn tantuntlem kaddun il’lem goribank ani gorjevontank divum yetalem. Il’lem-xem dilear ami khaim jevnnank patixer zaunchinant. Ami konnakui kitem ditat tedna vhoddli bobatt korun ditanv. Punn guptim dita tem Dev polleta ani To amkam xembhoreamnim farir kortolo.
Devan amkam xegunnamni bhorleant: Zhoim amkam nanv, man, podvi, duddu melltat thoinch ami he xegunn vapuddtanv. Amchean gavum yeta, vachum yeta, boroum yeta, vazoum yeta. Ani hea xegunnanim ami zaitem zhoddlam. Punn Povitr Sobhe pasot ami kelam tori kitem? He xegunn vapddun Devak man ani mhoima haddunk zatali nhoi? Hea xegunna vorvim amchem gorv vaddlem, vo ami khaltim asat?
Devan amkam vell dila: zaite pautti ho vell ami ibaddtanv. Goroz naslolem ani faideak poddonam tem ami vachtanv, aikotanv ani polletanv. Devachem Utor vachunk, niyallunk, jivit novsorunk ani magnnem korunk amkam vell nam. Eksureank sangat diunk, dukhestank buzvonn diunk, proxnnak sampoddloleank ami vell korunk nam. Vell boreak vapddunk ietalo, punn to allsayen, besarmayen, gozali korun, nhidun ami sarla. Pasar zal’lo vell amkam porot kednach mellchonam.
Devan amkam bolaiki dilea: Amkam aiz bolaiki asa, ti goddiek faleam aschinam. Bolaiki astananch amchean zaitem borem korum yeta. Aichem faleam dovrinastanam aiz korchem. Faideachem tem jevun – piyeun, visov gheun, vyam (exercise) korun amchean amchi bolaiki samballum yeta.
Devan amkam zaitem dilam. Tantuntlem Devachem tem Devak dhi ani khuxal jivit jie.
Eudecia Vaz