Mogall Firgozkaramno,
Novem xikxonnik (Academic) ani Gonvllik (Pastoral) voros suru korunk Sant Anton-ichim Novena ani Fest meuta. Kitlem mhonn ami subhagi Devacho axirvad gheunk ani bhoktiponnim anik ek voros suru korunk.
Bhagevont Antonichea zaiteam xikounnea ani mhonn’nneam modem ek bhov mhotvachi xikounn mhollear, to mhonnta “Actions speak louder than words; let your words teach and your actions speak”.
Katolik dhormacher zaite baxechi vaitt ani vankddi xikounn Europa-nt choltana Devache ieuzonne pormannem Bhagevont Anton utponn zalo. To Lisboa, Portugal eka girest kuttumbant 15 August, 1195 vorsa zolmolo. Taka bautism dilo tednam Fernando mhonn nanv dil’lem. 15 vorsanche piraier Fernando Canons Regular St. Augustine mottant bhitor sorlo. Padri zaunk Coimbra xiklo ani 24 vorsanche piraier padriponnachi makhnni ghetli. 1220 vorsa Morroco desantlean 5 franciscan martyranchem moronn polloun Fernando-chem jivit bodol’lem. Titlean taka apunnui ek missionar zauncho mhonn vhodd axea zali. Taka lagun Fernando Augustinian mottantlo St. Francis Assisi hanchea mottant ghelo. Thoim tannem aplem nanv Fernando aslem tem bodlun Anton mhonn ghetlem.
Anton Morroco missionar koso vochunk bhair sorlo tednam piddent poddlo ani porot ieunche vatter doriant tufanak lagun Sicily, Italy pavlo. 1221 vorsa Anton Assisi ghelo ani thoim Francis (of Assisi) hankam porxim meulo. Itlean Anton-ichem jivit sogllem bodol’lem.
Assisi ravlole kodden Anton-icho Provochonn korcho vhoddlo gunn dixtti poddlo ani itlean tachem jivit goroz thoim (Italy ani France desant) sermao korunk sarlem. Jezu baxen provochonn korunk tachea hatantlean zaiteo milagri korunk bhag meulem. Tachem utranim porgott korop ani kornneani milagri korop bhavarta vatten lokak ani dhormank zaitem faideachem zalem. Bhavart soddun voitoleank ani naka zal’lim sotam porgottoleank St. Anton ek bori dekh zalo. Mhonntoch tachem “Actions speak louder than words; let your words teach and your actions speak” ekdom khas zalem. St. Anton-ik lagun zaito lok katolik dhormant porot ailo.
Amchem xikop, amchem ulovop ani amcheo kornneo soglleo ek-sarkheo zaum-di. Karann hantunt amchem bhagevontponn asa.
Tumkam soglleank kuxalborit St. Anton-ichi Porob ani soglleam xikxokank borem voros anvdettam.
Tumcho Padr Vigar,
Fr. Andrew Pereira