“Hanvem tumkam kelam, toxench tumi-i korat”, hi Jezuchi adnia amkam hea vorsachea St. Anton-ichea Trezen ani Porbecho, mukhi vixoi zaun aslo.
Maiache 31ver, Padr Vigaran maddiecher axirvad ghalun Trezen-ak survat dilea uprant, Junache 1ler than Sevadhormik rit suru zali. Sanjechea 5:30 voramcher Bhagivont Anton-icho Ters, Kurov ani Ladain zalea uprant, 6:00 voramcher Povitr Misachi bhett bhetoili. Mukhi vixoi monant gheun, amkam, dispottim lagu zatolea vixoiancher zoxe porim, xrixtti, bhogsonnem, odhikar, kurpa, mog ani ekvott, pekovnni, promanikponn, khaltikai, adi somzonnim diunk zaitea Iadnik bhavamnim ieun provochon kelem. Fr. Movin Menezes, Fr. Nelson Sequeira, Fr. Candido Fernandes, Fr. Edson Fernandes, Fr. Damaciano Carvalho, amcho Padr Vigar Fr. Andrew Pereira ani amcho Padr Kur, Fr. Leslie Gomes hannim thokos gheun Trezen-achim Misam bhettoun provochon kelem. Junache 13ver, vhodda dobajean Porob somorombli. Padr Vigar, Fr. Andrew Pereira, Fr. Agnelo Pinheiro ani Fr. James Torres Silva hannim sangatim porbechem mis bhettoilem. “Jezun kelam toxench, Sant Anton, sotacho, khaltikaiecho ani magnneacho monis zalo….Ami-i tache bhaxen zaunk vavrum-ia”… ho porbecho vixoi zaun aslo ani hea vixoiacher Fr. Agnelo Pinheiro, hannem Provochon korun, amkam zaiti xikovnn ani mahiti dili. Tache xikovnnen zaitea zannachea dolleanim dukham ailim. Padr Kur Fr. Leslie Gomes –achea fuddariponna khal gaion monddolan sobit talleanim, gaionam kelim. Zorui potrancher ani TV-cher, tufanachi ani pavsachi bhirant asli, Devan amkam amchi Porob bori bhaxen zaunk, mausam (Weather) itlo boro kelo, ki pavsacho ek tembo passun poddunk nam. Hakach lagun chodd ani chodd apekxha (expectation) bhair lok porbek hajir zalo. Odmas kortat te bhaxen, ded hozar mhaiz lokan vantto ghetlo. Devache upkar attounk goroz. Zaitea zannanim hi porob ani trezen bore bhaxen zaunk zaito adar dilo. Aplo vell, vostu ani duddvancho khoxe monan adar sohokar dilelea khatir, soglem bore bhaxen zalem mhonn ami sontostanv. Zaitea zannanim aplea khaitr upkar magun maglem ani Bhagivont Anton-iche mozotin, Devan zaitea zannachim magnnim aikolim ani tankam khuxal kelim. Zaiteanim aplim bhavnam ani Devache upkar attoun amkam kolloilem, aikun Devak ami vakannlo. 2008 vorsa than hem devosanv, Bhagivont Anton-ichem, hea Kopelant vaddot ani choddot asa. Dor mhoineachea, Poilea Mungllarak amchem Noven, Ters ani Ladain sanjechea 6:15 voramcher ami korit aileanv, tem hea fuddem chaluch astelem.
Sant Antonik amchim magnnim bhavarthan Deva fuddem vhorunk chaluch dovrum-ia. Favo tea vellar, Dev amchem magnnem aikotolo. Sant Antonichem devosanv vaddonk ani choddonk mhojem khaltem magnnem hanv Devak ubartam ani sogllea denneam khatir Devache ani bhagivont Anton-iche upkar attoitam.
– Felix Dias