Tadev: Dev boro Dis dium, Simao Titiv.
Simao: Tuka-i dium Tadev. Hea disamnim tuje thaim ulounk mellonk nam. Punn tuka hanvem Bhagevont Anton-ichea Festak pollelolo.
Tadev: Oi Titiv, hanv Festak aslom. Tea adim dor disa Trezen-achea Misak-ui hanv hajir aslom.
Simao: Ekdom borem kelem. Zaito lok aslo nhoim? Sogllem manddavollin zalem tem polloun borem dislem. Lokak Bhagevont Anto-icher zaito bhavarth asa dekhun pois axil’lea ganvantlo passun lok hangasor ieta.
Tadev: Oi lokacho bhavarth tho. Milagrincho Sant dekhun tache vorvim zaiteo milagrio zaleleo ami dekhtanv ani polletanv.
Simao: Sarkem tujem. Maglolo upkar mell’lo mhonntoch lok argam diunk-ui ieta ani apleo angovnneo farir kortat.
Tadev: Argham attovop ek bori korni nam tor ami onupkari koxim zateleanv. Simao Titiv, hea vorsa, Sao Joao-chem fest, Jun-achea 24ver zaunk nam?
Simao: Nam Tadev. Hea vorsa Jun-ache 24ver, Jezuchea Bhov Povitr kallzachi Porob ani hakach lagon, Povitr Sobhen, Sao Joao-chi porob Junache 23ver dovorli. Zaitea vorsanim heo donui porbo ekach disa aileat dekhun hi bodolnni keli.
Tadev: Oxem korop sarkem asa. Jezuchea Povitr Kallzak odik man diunk goroz.
Simao: Halinchea vorsamnim, Sao Joao-chi Porob fokot vyavsaik (commercial) zaleli ami polletanv. Vhoddlea ‘hotel’-anim somorombh ani dans korun hi porob monoitat.
Tadev: Tea bhair lok ganvchea baim-anim ani noiom astat thoim udkant uddki marun, soro pieun. movza kortat nhoim?
Simao: Oi, hem soglem korun hea festachem mukhi karann visortat. Ankvar Mori, aple mavxi bhoinn, Elizabeth-ik bhett korunk geloli tednam, tichea kusveant aslolea Jezun uddki marli. Hench tem karann hi porob somorombunk. Punn hem ami visortanv.
Tadev: Ami sogleamnim, odik korun, bhurgeamnim ani tornatteamnim hem ghott monant dovrunk zai, kiteak, o-kristi lok he Porbecho faido ghetat ani Kristi lokak lojek ghaltat.
Simao: Amchea gineanacher Devan uzvadd ghatlear puro. Borem Tadev, mhaka bazarant vochunk zai.
Tadev: Borem Titiv, Mog asum.
-Felix Dias