Tadev: Simao Titiu, Dev boro dis dium. Tum ani tujim ghorchim koxim asat?
Simao: Baba Tadev, ami sogllim borim asanv, Devache kurpen. Punn tum chintest-so distai, kitem zalem ani ho tuzo ‘mobile’ gheun khoim vetai? online class-ik network sodtai kitem?
Tadev: Nam, Titiv, hanv tukach mellonk ietalom.
Simao: mhaka mellonk, anink kiteak?
Tadev: Zannaim Titiv, mhaka konnem ek video-cher sondex pattoila tachi mhaka matxe somzonni divxi?
Simao: Koslo sondex?
Tadev: To mhonntta, ‘ hea sonvsarant monachi xanti zhoddtolo zalear, tin suatancher bhett kor ani thoim niall kor- teo tin suvato zaun asat hospital, bondkhonn ani simiter’.
Simao: Sarkem tachem. Tuka hanv sarki somzonnim ditam.
Tadev: Hanv aikonk axetam.
Simao: Jednam tum hospitalant vetai, tednam tuji bolaiki kitli mholachi tem gomon ieta. Devan tuka rakhla ani bori bolaiki dilea dekhun Devache tum upkar attounk pavta.
Tadev: Oi titiv, hem sarkem sanglem tuven.
Simao: Tum zor eke bondhkhonn-ik bhett korxi, zalear tuka suttka vo azadi hea utrachi kimot gomon ieta. Tujer konn hukumxahi cholounk xokonam. Tum tuzoch mali, oxem tujean mhonnonk zata. Tum tujem jivit meklleponnim sarta ani Devan tuka ho bhes favo kela dekhun tum Devak dhinvasunk pavta.
Tadev: Kai borem chintop tujem titiv. Tor simiter-icher tum kitem sangtai?
Simao: Simiterint ami bhett keli zalear amkam mornacho ugddas ieta punn tum ani hanv jive asat nhoim? amkam Devanuch rakhleat ani aiz meren jivim dovorleant.
Tadev: Hea sonvsarant jietana dor ghoddiek amkam Devak dhinvasunk soeg mellta. Zaite pavtt oxem korunk ami visortanv.
Simao: Niallun polle Tadev. Fokot ek melolo monis Devak dhinvasunk xokonam punn ami jivim astanam Devache upkar sogllea vellar attounk xoktanv.
Tadev: Titiv, kai bore vichar tuje. Mhaka bore bhaxen somzaun sangleim. Dekhun tuka chodd Dev borem korum.
Simao: Devan tujer axirvad ghalun. Borem tor, vetam hanv.
-Felix Dias