“Punorjivontponn ani Jivit Hanvuch. Jim konn Mhojer bhavarth dovortat, tim melim-i zalear jivim astolim ani jim konn jivim asat ani Mhojer bhavarth dovortat tim sasnnak morchim nant.”
Ju 11:25-26.
Dev aple podven ho sonvsar ani tantunt asa titlem rochta ani hem sogllem Devak borem dista. Dev mon’xak aplea sarkeacho rochun hem sogllem tachea hatant dita. Rochnecho samball korunk Dev mon’xeak ulo dita. Punn monis apleponnan bhorun Devache nem-kaide moddta ani patkacho gulam zata. Torui patkant aslolea mon’xeank Dev soddinam. Mon’xachi soddvonn korunk Dev apli yevzonn toyar korta ani apunnuch monis zaunk yevjita. Apunn Dev zaun-ui amche sarko zaunk to yevjita.
Dev apunn monis zaunk, mon’xeakuch vichun kaddta. Akh’khea sonvsarantlea mon’xeank soddun, Dev Nazaret nanvachea Galileiantlea eka nogrant aslole eke soirik-zal’le ankvarik vinchta. He ankvarichem nanv Maria. Devachi yevzonn kollit korunk jen’na Gabriel dut Marie sorxim veta, ten’na ti ghaborta ani hem kitem kai mhonn ti chintunk poddta. Bhirantin Maria bhorta, Devachi yevzonn tika somzona, torui ti Devache yevzonnek ‘hoi’ mhonn zobab diun, mon’xache soddvonnechi vatt manddunk Devachi adharinn zata. Devachea soddvonnechea vaurant hem zaun asa Mariechem khaxeleponn. Aplea hoikara vorvim ti soddvonnechea vaurant misoll zata ani apnnakuch ompun dita. Hacho foll koso Dev tika sorga ani sonvsarachi Ranni mhonn porgott’ta.
Agostache 15ver ami Ankvar Mariechea sorga-vhoronnachi porob somorombhtanv. Ho ghutt ami tersachea magnneant “Suam Jezuchea mornna uprant Ankvar Mori sobar vorsamni sorgar geli” mhonnun, spoxttponni uchartanv ani manun ghetanv. Ami Ankvar Mariechi kudd sorgar geli vo ticho otmo sorgar gelo oxem ucharinanv. Punn ‘Ankvar Maria’ – monis koxi (as a person) – sorgar geli mhonn ami manun ghetanv. Mariechem sorga vhoronn mhollear Devan tika kuddi-atmea soit sorgar vheli. Hem khaxeleponn Dev tika favo korta. Ani tench sot Pap Saib Pius XII, Povitr Atmeachea preronna vorvim, Novembrache 1ler 1950 vorsa akh’khe Povitr Sobhek porgott korta.
Ankvar Mariechem sorga-vhoronn tichea nixkollonk gorv-sombovak zodlolem asa. Dev tika zolmakuch thaun patka vinnem rochun haddta ani patka vinnem samballta. Jezun aplea mornna vorvim patkacher ani mornnacher zoit vhelem ani hea zoitachim follam to amkam favo korta. Punn mornnacher zoit jem Jezun amkam favo kelam tem purnnponnim amkam fokot nimannea disa favo zatelem jen’na ami punorjivont zatoleanv. Ani hakach lagon amcheo kuddi hea sonvsarantuch kustat vo hangach urtat. Punn Ankvar Marie sovem oxem ghoddonk nam. Tichea nixkollonk gorv-sombhava vorvim tika patkacher zoit favo zata ani nimannea disa jem punorjivontponn amkam asa tem atanch tika favo zata. Hem zaun asa sot Ankvar Mariechea sorga-vhoronnachem.
Kuddi-atmea soit ti sorgar gheli zalear Ankvar Maria morunk na kai? Povitr Pustok amkam heo vostu sangonam. Punn porompora asa ti ami polloit zalear, Ankvar Mariechea mornnacho ugddas ami kortanv. Amchea zaitea firgozamni Agostache 13ver hi porompora palltat. Porompora zoxem amkam sangta, Ankvar Marien aplem karia hea sonvsarant sompoilea uprant ti meli khori, punn Devachi Avoi ti aslean punorjivont zaun, kuddi-atmea soit sorgar gheli. Haka lagun tichea mornna von, tichea sorga vhoronnak ami odhik man ditanv.
Ankvar Maria meli vo na, ho proxnn gorjecho nhoi punn gorjechem tem tichem jivit. Tichem jivit amkam dor ekleak ek dekh ani dixa. Char vostu Mariechea jivitantlean ami gheum-ya.
- Poilem, tichem jivit ani ticho sombhondh Deva sovem zaun asa amkam dor ekleak mhotvachem. Ankvar Maria amkam Devache khuxek khalti ravun, Tachi khuxi amchea jivitant manun gheunk xikoita.
- Dusrem, Devachi khuxi aplea jivitant manun gheun, tichem jivit khuxalkaiechem zata oxem nhoi. Devachea Putachi avoi zaunk tika bhag mellta khorem, punn teach borobor zaite proxnn, addkolli, koxtt tichea jivitant bhitor sortat. Punn hea soglleak ti khuxe monan hoikar dita. Hich dekh Maria aiz amkai dita. Devachi khuxi jivitant manun ghetoleanv zalear, jivitant yetolea koxtta-addkollink-ui khuxe monan ami hoikar diunk.
- Tisrem, Devan apnnak dilolem misanv ti xarti pavoita. Ani hench tichea mornnachi porompora khunnaita. Ti meli zalear, Devan apnnak dilolem karia aplea jivitantlean tinnem bore bhaxen pall’llem ani Tachi yevzonn sakar korunk Devachi adarinn ti zali. Amchea jivitant Devan amkam dilolem misanv xarti pavounk ti amkam-i xikoita.
- Choutem, tichem sorga vhoronn zata ticho inam. Apnnachi khuxi kortoleak Dev ken’nach sanddinam. Hench Ankvar Mariechem sorga-vhoronn amkam xikoita. Devachi khuxi aplea jivitant pallunk tika sompem zaina. Torui ti Devacher bhavarth dovrun, jivitant fuddem cholot ravta ani zoitivont zata. Heach zoitacho inam Dev tika favo korta. Amchea-i jivitant ami Devachi khuxi palltanv ten’na tacho inam amkam jerul favo zatolo mhonn ami bhorvoxean jiunk amkam Maria ulo korta.
Mariechi sorga-vhoronnachi porob ami somorombhtanam, tichem jivit amchem korunk ami vaurum-ya. Tinnem dakhoilolea rostear cholun, tinnem zoddlolo inam amkam mellunk amcho proitn chalu dovrum-ya.
Pri. Movin Menezes