Mogall Firgozkaramno,
Zaitea devoçao-a modem, soglleam von chodd vhodd devoçao mhollear Saibinnichem. Tantunt modem chodd ani soglleanger cholta tem mhollear – Ghorant Saibinn vhorun ladin korchem. Zaitea ganvamni Setembr-ache 8ver Saibinn ghorant vhorunk suru kelem. Punn hanga Otumbrache 13ver suru kortelim. Tea pasot soglleamnim hem korunk apli atmik toiari suru korchi mhonn mhozo usko.
Hem devoçao kortanam bhov thoddo ithas zannam zalear odik faideachem. Hea devocao-ant Saibinnichi ladin kortat. Konknnin LADIN, portugese-n Ladainha, English-in Litany ani Latin baxen Litania mhonntat. Litania mhonnchem, ‘prayer of invocation or intercession’.
Saibinnichi ladin Italy desant, Loreto xarant, Saibinnichi shrine asa thoim suru zalli. Thoim zaito lok voitalo mhonntoch hi ladin tanche modem bori famad zali. Sangtat te baxen hi ladin 1558 sumar chalu zali. Europak Reformation zatalem tednam Katolk dhormacher khub vaitt odruxtt ailem. Igorjentleo zaiteo imagji ani povitr chitram moddun ani foddun bhair udoitale. Tantunt modem Saibinnichem devocao bond korunk zaite protin bi choltale. Tednam St. Peter Canisius hannem ti ladin odik chodd nettan korunk aplea boroupanim tenko dilo. 1587 hea vorsa Pap Saib Sixtus V hannem ladin korunk porvangi dili.
Ladin kortanam 12 magnnim Saibinn-k ‘Maie’ mhonn ulo kortat.
6 magnnim Saibinnik ‘Ankvari’ mhonn pachartat,
13 nanvam Adlea Korarantlim ghatleant,
4 nanvamni tichi mozot magtat ani xevottachim
13 Saibinnik ‘Rannie’ mhonn nanvam ghaltat.
1587 vorsa mandun ghetlole ladin-i uprant bhov thoddim navam vaddoilim. Dekik: Zaiteam Povitr Ruzai-chea zomeank lagun 1675 vorsa ‘Bhov Povitr Ruzariche Rannie’ mhonn vaddoilem. 1883 vorsa Pap Saib Leo XIII hannem ‘Soimbachea Khotavinn ghorb sonvbovlole Rannie’ ghatlem. 1950 vorsa Pap Saib Pius XII hannem ‘Sorgar vhelele Rannie’ mhonn nanv dilem. 1980 vorsa Congregation for Sacraments and Divine worship hea khatean Saibinnik ‘Igorjeche Maie’ oxem goroz thoim ghalunk sanglem. Ani xevottak 1995 Pap Saib Joao Paulu II hannem Saibinnik ‘Familinche Rannie’ mhonnunk maglem.
Saibinniche ladin-ichi khobor kortanam Igorz-maten mandun ghetleleam dusream ieram ladin-icho ugddas korum-ia. Teo mhollear:- 1. Santam-bhoktanchi ladin, 2. Jezuchea Bhov Povitr Nanvachi ladin (1886), 3. Jezuchea Bhov Povitr Kallzachi ladin (1889), 4. Bhov Povitr Rogtachi ladin (1960).
Oxem hem sogllem sadhem punn chodda mhotvachem devocao astanam ami amkanch ugddas korum-ia. Him devocao-am bextinch ieunk nant. To bhailo dobazo ani poixeancho nett dakhouncho soeg nhoim, punn eka-meka pasot Saibinni lagim magnnem korpacho ani bhagevont zauncho panvddo mhonn gheuncho. Tea pasot Saibinnichi murti zata te baxen soglleam kuttumbani/ghorant vorchi mhonn magtam. Saibinn ghorant astanam zata zalear ani goroz aslear sirvisek voitat tannim ek dis sutti/leave ghetlear odik borem zaupachem. To dis akhea kuttumban odik ekthaim ieun magnnem korchem. Ghor legun bore baxen nivoll dovorchem. Zata zalear ghorcheanim tea disa sokallim igorjent misak legun ailear odik borem. Jevnnam-khannam ani decoration ho ek poilo nhoi, punn nimanno usko zauncho. Hem baxen soglleank ghorant Saibinn vortanam Devachea axirvadacho soeg zauncho.
Tumcho Padr Vigar
Fr. Andrew D. Pereira