Sant Juze Vazachem jivit vachun polletoch to ek vhoddantlo vhodd Sant mhonn amchean khatren ani obhimanan mhonnonk zata. Sant Juze Vaz hea sonvsari poinnar ek khorelo Sant koso jiyelo. Devan apnnak dil’le talent tannem vollkhun ghetle, khub thokos gheun tanchi udorgot keli ani sogllea udarponnan tea talentam vorvim Devachea molleant mogan vavr kelo. Sant Juze Vaz, Cristopher Vaz ani Maria Miranda hancho tisro put. To Abrilachè 21ver, 1651 vorsa aplea avoychea ghora Bannavli zolmolo. Abrilache 28ver Jezuit Padr Vigar, Jacinto Pereira hannem Bannavle-che Sant Juanv Batistache Igorjent taka Bautism dilo ani Juze Vaz mhunn taka nanv dovorlem. Sebastiao Vaz ani Esperanca Miranda tachim padrin ani madrin zalim. Tacho bapui ek bhagevont katolik. Tanchea ghorant dispottim omkeach vellar magnneak ektthaim zatalim ani Avoi dotorn xikoitali. Xikpant ekdomuch huxar, apnnachem chintinastana goribank adar diunk sodanch toyar. Magnnem kortana ek anj-boddvo koso Sant Juze Vaz lhanunch astana padri zaunchi khuxi dakhoitalo. Povitr sakramentant ravtolea Jezuk nomoskar korunk Ratche modianir uttun to Kutt’talleche Igorjent vetalo ani eke rati to daraxim pavtanch, hem dar apxinch uktem zata ani Sant Juze Vaz bhitor sorun Povitr Sakramenta mukhar magnneant gul’l zata. Sant Juze Vaz aplea jivachi porva korinastana Devacher patiyeun Devacho vavr korunk Ceylon-ant veta. Kristi bhavartheanche ghorabe sodun kaddunk veg-veglle bhes to gheta. Xubhvortoman porgottunk, supurlea bhurgeank doton xikounk, lipchoriam Misachi bhett ratchea vellar bhettounk, kednam – kednaim bhikareacho bhes gheta, kednam nustem vikpi, poder ani kednaim ostorechem rup pasun tannem ghetlem. Kristi bhavarth jivo dovrunk, piddevontank ilaz diunk, gorjevontank khoinchea vellar sonvskar vanttunk paiam-ank vhanno ghalinastanam Ceylon-ant bhonvun bhavarth jivo dovrunk, aplem jivit sompoilem. Sant Juze Vaz-an Devachi khuxi lhanvikaien mandun gheun, jivitant melltolea addkhollim add zhuzhun ani seve – chakrechea jivitachea pormollan dusreanchem, odik korun goribanchem, jivit nettoun, Kristi bhavarthachi vatt apunn cholun dusreankui dakhoili. Sant Juze Vazachi bhokti firgojent ani kuttumbant odhik vaddounk ani thiraunk Bism Saiban ho zomo ghoddun haddla. (Teams of Evan)
Firgojent satolleak ek dis tori tache pasot bhettouncho. Bhov korun Sukhrarak. Tea disa Igorjent Novenachea magnneacho vo yer prarthonacho ters, vo piddevontam pasot magnnim korchim.
Soglleank amkam Sant Juze Vaz sfurti ani adar zaum.
Eudecia Vaz