Fattlea vorsant (2019) okosmat zaitim kazaram zalim. Hea vorsa (2020) bhov thoddim zatelim. Hachem karann mhollear hem Leap Year. Oslem dor tin vorsam uprant chovtea vorsak zata. Febrerachea mhoineant 29 tarik ieta. Zaitea lokache azun achar ani bhirant asa. Khorem mhollear hea adhunik kallar oxem zaunk favo nhoim aslem. Sonvsarak suriachea bonvtonnim gunvun aslea zagear porot pavunk 365 dis ani 6 voram lagtat. Punn tim 6 voram koxim mhonn ghaltolo? Suria bonvtonnim sonvsarachi vatt ani suvat eka vorsa bhitor samballunk 6+6+6+6 voram ekthaim korun dor chovtea vorsak ek dis kortat. Ani taka ami Leap Year mhonntat. Jem kitem borem vo vaitt zaunk zai tem eke kinnam bhitor zaunk zata. Amchea vaittachem karann dusreancher ghalunk ekdom sompem.
William Shakespeare oxem mhonnta, “It is not in the stars to hold our destiny but in ourselves.” Dor eklea boreacho zonn eklo dhoni. Konn eklo khoim zaite pautt mhonntalo, “Aplea ek sort (lottery) laglear puro, apunn vhodd grest monis zatolo.” Ti sort (lottery) taka lagunk to kednanch ek sort vikti ghe naslo. Tosli ghot zaite pautt amchi zata. Borem zaunk vo konnui vhoir sorunk eka vo don disamni zainam. Thoim short cut asna. Konnui vhoir sortolo zalear vorsanchea vorsam menoit korchi poddta. Vaitt zaunk vo jivitant vhoir aslo sokla poddunk vell naka.
Hea 2020 vorsa kitem tori thodde bore nichev gheum-ia. Somazant zaitem vaitt dixtti poddta ani ghoddta. Tache guneanvkar zaite pavtt amich. Akhea desacher kallim khupam ximpoddlelim dista. Lokachem mon niraxi zal’lem asa. Gorbisann vaddot veta. Konnacheruch patieunk bhirant ieta. Oslea vellar ani poristhitint amchi Kristi lokache govaikechi ekdom goroz asa. Itihasant legun pollounk mellta. Vaitt ailem tednam Kristi lokacho bhavart boro ani ghott zalo ani kristachi odik chodd porgottnni zali. Vaittantlean zaitem borem ieta. Niraxi zaunche suvater kalljidar zaum-ia. Pollun veche suvater soglleak fuddo korum-ia. Hench tem Kristi bhavarti jivit.
Soglleank tumkam kuxalborit 2020 novem voros.
Tumcho Padr Vigar
Fr. Andrew D. Pereira