Tadev: Dev boro dis dium, Simao Titiv. Zaitea disamnim meuloi. Chintest-so distai, koslea chintnamnim buddlai?

Simao: Dev tuka kurpa dium, Tadev. Hea disamnim hanv chodd-so bhair soronam, hea COVID duensache bhirantin. Kitle-xech mhoine zale, hi pidda amchi vattuch soddinam. Fatllea prachit kallant zo dhoko boslolo to azun chaluch asa. Kitlim amchim Novenam ani Festam amkam nam zaleant.

Tadev: Devache kurpen atam amcheo Igorzo ani Kopelam ugttim zaleant ani khoxeci khobor mhollear amcho Patron, St. Sebastiao-achi Porob ani Novenam amkam bore bhaxen somorombunk sondi mhelltoli.

Simao: Oi, Devak argam dium-ia. Tadev, mhaka adlea amchea Novenam/Festamcho ugdass ieta. Tum tednam lhan bhurgo aslo.

Tadev: Kosli ontor asli tor, jem mhaka pollounk mellonk nam?

Simao: Zannaim tum amchi atanchi Igorz, poilem Kopel aslem ani Sant Sebastianv Kopel vo Punddam Kpoel mhollear sogle vollkotale. Adlea Kopelachea pattlean je pundd asat te tunvem polleleat nhoim?

Tadev: Oi Titiv, te hanvem polleleat. Punn tednam, Noven ani Porob koxi zatali tor?

Simao: Ami Navelim Firgojechim vangddi asleanv. kiteak hem amchem Kopel aslem. Novenachi toiari hurbhen zatali. Maddiechea disa sanje Bhagivont Sebastiao-achi murti, Navelim Firgojent than vhodda bhoktin ani gonngonnan, pursanv kaddun amchea Kopelant haddtaleanv. Navelim tem Moddganv ani Moddganv tem Aquem, hea rosteavelean hi mirvonnuk zatali ani vattevelo lagu zatolo soglo lok tantunt vantto ghetalo. Rosto bonderam ani ‘arc’ ghalun sobit diso, zalear vati ani fogotti / hozne pettoun ghonngonn vhaddtalo. Khuxalkaien soglea dhormacho lok bhag ghetalo, kiteak pest-pidda nivarta mhonn lokak Bhag. Sebastiao-cher bhavarth aslo.

Tadev: Punn Titiv, rostear zaitim mottoram, motorcycle astat ani rosto vyast (busy) asta nhoim?

Simao: Tea kallar, titlim –xim naslim punn atam bhorpur vaddleant. Hakach lagun, nimannea don vorsank, hem pursanv Navelim-Aquem/ Baixo – Rawanfond, hea rosteavelean zalem. Mirvonnuk Kopelant pavtokuch, bhoktiponnan Maddiechem Mis zatalem. Sogle vatter ani Kopela lagim ganvtti muzg astalem ani tuje sarkea bhurgeanchi urbha vaddtali. Kopelachea fuddlean mattov astalo ani zhaddanchim panam / talle, vo bonderam ghalun sobitai vaddtali. Uprant nov dis Novenak ani Porbek ganvcho ani sorv-bhonvtim ravtolo zaito lok bhag ghetalo. Sodanch hi Porob, poilea Carnivala disa zata mhonntoch zaitim zannam, hi porob, ‘Intruz Saibachem fest’ oxem mhonn pachartalim.

Tadev: Zaiti mahiti tunvem mhaka dili. Punn hi porampora kednam bond zali tor?

Simao: Novembrache 3 tarker 2002, vorsa, amchea Kopelak Firgojecho dorzo favo zalo mhonntoch ami svotontr koxim zalim. Soglim bodlopam zalim, bhagivont Sebastiao-achi Firgoz zolmak aili, punn hem Navelim-chem pursanv ietalem tem bi bond zalem.

Tadev: Punn lokak bhavarth asa dekhun, atanchea Novenak vo Festak him sorv bhonvtim jietolim bhav-bhoinnam bhag ghetat nhoim?

Simao: Oi, tim bhag ghetat ani fuddarakui bhag ghetelim munn mhaka visvas asa, kiteak ho amcho Pest-pidda nivartolo Sant.

Tadev: Dubavaviret. Tuka chodd Dev borem korum Titiv. Zaiti mahiti mhaka meuli.

Simao: Bhag. Sebastiao-ache vinovnnen amche veleo sogleo pidda nivar ani amkam surokxit samball munn Devak prarthum-ia. Tuka ani tujea ghorcheank ek Povitr ani kuxalbhorit porob anvddetam.

Tadev: Oi Titiv. Atam amche modem asleli hi COVID pidda sarkich nopoit korunk ami magum-ia. Tumkam Porbechim un-unit porbim.

By Felix Dias