Mogall firgozkaramno,
Fattleam disamnim konnem kednanch adim polleunk nam toslem polleunk pavlim. Kitlim sogott mornnam. Ani voita thoim moddim. Meloleam mon’xancheo kuddi lhasounk line korchi poddtali. Lhasounk lhakudd nam zaun ani moronn korunk marog poddta mhonn Uttar Pradesh ani Bihar lokan meloleo kuddi Ganga nhoimche dodder purleo. Tantuntleo zaiteo udkant vhavun gheleo. Hanga Aquem ganvant legun kitlo mhonn lok fattlea mhoineant morun ghelo. 15 disam modem hanvem 12 mornnam kelim.
Oslea vhoilea dekhaveant sogllem dukh ani roddnnem. Dista, roddun, roddun dolleantlim dukham soit sukhun ghelim mhonn. Oslea odruxttak konnuch nam zap ditolo ani zobabdari ghetolo. Zobabdari aslole monis lipun ravle. Thoddeanim guneanv dusreancher ghatle. Zobabdari asloleanim hem odruxtt porjecher magun ghetlem.
Atam dusrem ani kitem suru zalam. Oslea dukhant lokak fottounk “Feel Good” campaign suru kela. Mornnacho ankddo soglleakuch lipoila. Piddest zaloleanchoi ankddo nam ani meloleanchoi ixeob nam. Voita thoim soglleo fotti-cher fotti marop. Sogllem borem cholta mhonn voita thoim T.V.-cher baxonnam divop. Bharotant sogllo lok nirxel’la.
Vaitta modem zaite pavtt borem disun ieta. Ghel’lea Mars ani April mhoineant kel’lem toxem zaitea lokan he-i pavtt apli doiall-ai ani kaklut dakhoilea. He pavtt jevonn diun nhoi, punn Oxygen diunk pavleat. Hache bhair osleo zaiteo ani boreo kornneo lokan korun dileo. Goy-ant legun kitlea Igorzanim ani Kristi dhormik ghoramnim Covid zaloleank asro dila. Tanchi dekh-bal kelea. Ravunk suvat kelea. Zaum tancher soglleancher Devacho axirvad poddum.
Halinch ek lhan bhurgeachi khota dixtti poddlea. Tachi avoi Covid zaloleank jevonn korun daddta. Ani ticho lhan 5-6 vorsancho put (son) aplo marker gheun jevnnachea ek-ek packets-ancher “khuxh rahiye” (be happy) mhonn sondex boroita. Kitlo lhan bhurgo punn kitlo movall ani uskeachea sobhavacho. Zaum tachi hi osli lhan kornni amkam-i soglleank dekh ani nett.
Oslea roddnnea dukhachea vellar amkam-i eka-mekachi bhuzvonn mellum.
Tumcho Padr Vigar
Fr. Andrew Pereira