Vincent de Paul hancho zolm 24vi April 1581 vorsa zalo. To Bertrande de Moras ani Jean de Paul hancho put aslo. To sov bhurgeam modlo tisro bhurgo. Zaka ami Bhagevont Vincent de Paul mhonn vollkhotat, to Fransacho Kristi dhormacho munniari aslo. Tannim apli jinn goribanchi seva korun sarli. 1622 vorsa toddo kall tannem bondkonnint vavr kelea uprant taka ‘Congregation of the mission’ hacho vhoddil kelo. Thoim tannem goribsannicheo, nirmollponnacheo ani khalteponnacheo angvonneo keleo. Tedna to thoim padrink retir kortalo ani padrim modem ji xellmollai asloli ti pois korunk vavurlo, ani goribanchi seva korta –kortam to 79 vorsamche pirayer 27ver Setembrache 1660 vorsak somplo. Taka 16ver Junhache 1737 vorsa Pap Saib Clemens XII hannem bhagevont mhonn pacharlo ani tachea omor ugddasak Paris, France hangasor St. Vincent de Paul Chapel bhettoil’lem asa. Taka goribancho ani goddeamcho askari mhonn man’tat. Bhagevont Vincent khaltea soimbhacho, doyall kallzacho ani udar monancho aslo.

Tachi dekh gheun ami goribanchea uskean ani mogan vaddchi goroz asa. Ami-i eka disak gorib aslim ani konnem-i tori amkam adhar dilo ani ami goribsannintlim bhair sorlim. Aiz amche lagim duddu- girestkai asa. Punn goroz asa ami amchea sorv – bhonvtim aslolea goribank adhar diunk ani tankam khuxal korunk. Oxem kelear Bhagevont Vincent de Paul hache vorvim Devacho axirvad poddtolo. Amchean amche Igorjent aslole St. Vincent de Paul sonvsthen bhitor sorun mogan goribamchi seva korunk yeta. Aiz mon’xak nhoi fokt duddvanchi goroz, punn tankam amcho sangat zai, tankam amcho mog zai, tankam amchi bhett zai, tankam amcho vell zai.

Osleo vostu tankam amche vorvim mellot zalear tim goribsannintlim bhair sorun girest zaum yeta. Ami amcho vell nhidun, chakattam marun, allsayen sartanv. Zori ami vellantlo – vell kaddun he sonvsthe vorvim gorjevontanchi seva kel’li zalear ami dusreanchem jivit khuxal kortana ami-i khuxal zatolim aslim.

-Eudecia Vaz