Tadev: Dev Boro Dis dium Simao, Titiv.
Simao: Tukai dium Tadev Bab.
Tadev: Tujea hatant aslelea potrar kosli khobor ailea?
Simao: Bori khobor kainch nam. Dor disa kirmi, chorio, bolatkar, maramari. zhogddim ani zuzam. Vachunk porian vitt ieta.
Tadev: Halinchea disanim hem chodduch zalam nhoim?
Simao: Oi, anim hem vhaddot asa. Konnakuch bhirant mhonttleli nanch. Hea fuddem anink kitem pollounchem asa tem Devuch zannam.
Tadev:  Pulis aplem kam sarkem korinant?
Simao: Korinant oxem nhoim punn lokak bhirant lagonam kiteak chodxe pavtti oslea ghatkeank rokddech soddttat. Niaisobhent tankam zaminacher soddoitat.
Tadev:   Amchea kaideant kosloi tori bodol ieunk zai.
Simao: Oi, sarkem tujem. Koddok kaide haddche punn te vevharant ghalche, hem chodd mhotvachem.
Tadev:   Tum oxem kiteak mhonntai?
Simao: Zaite pavtt kaido asunuim Pulisancher dobhav ghaltat. Rajkaronn choloitele odhikari pulisank aplem kam korunk mona kortat. Eke bhaxen, kaideanchim fokannam kelele bhaxen apli vagnnuk dakoitat. At’tem aslolem pot’tem kelolem amkam dista
Tadev: Zaite pavtt amche Iadnik bhav aplea provochon-antlean porian kai bori xikovnn ditat. Oslem vaitt pois korunk magtat ani zagrutai haddunk proitn kortat, nhoim?
Simao: Tanchem babddeanchem konn aikota? Tem omtea kollxear udok zal’lea porim zata.
Tadev: Halinchea disamnim zaitim zannttim bhavam-bhoinnam bhirantin aple dis sartat, apleacher konnuim akromonn korit mhonn. Sorkaran hacher ghombirponnan nodor ghalunk goroz. Simao Titiv tum matxe kallji ghe.
Simao: Oi, zaite pavtt tankam adar diunk konnuch asonam kiteak tim eksurim aplem jivit sartat. Amchea bhurgeponnar ami bore dis sarle. Zannaim Tadev, adim lok ratcho nidtanam aplim daram ani zonelam ugttim dovrun nhidtalim. Konnachich vaitt vagnnuk disonasli kiteak lokak bhirant asli. Ekuch havaldar porian aslear puro zatalem.
Tadev: Toslem xantichem jivit amkam sopnant pasun mellot-xem nam. Titiv tum noxibvont, kiteak tunvem hem onnbhovlam.
Simao: Devache kurpen ani axirvadan ami bore dis sarle. Fuddem jivit Tacheach hatant ghalum-ia ani amkam sogleank surokxit samball mhonn magum-ia.
Tadev: Devacher amcho bhavarth dovrun ami jieunk vavrum-ia. Borem tor Titiv vetam hanv, mog asum-di.

-Felix Dias