Tadev: Dev boro dis dium Simao Titiv. Tuka hanvem Igorjent Misak pollelolo. Hea Prachit Kall-achea disanim zaitim zannam Misant vantto ghetat tem polloun Borem dista.
Simao: Oi,punn choddxim bhurgim ani tornattim dixtti poddonant. Hem Corona Duens eun, zaiteanim Misak eupachem soddun dilam.
Tadev: Punn Collegint,bazarant vo dusrea suatancher tim vetat, duens fokot Igorjent asta?
Simao: Valor tuka. Tanchem chintop chukichem.Korem mhollear Igorjent Devacho axirvad asta ani ami surokxit urtanv. Hi xikovnn tanchea avoi-bapain tanche motint ghalunk zai
Tadev: Sarkem tujem. Amche Iadnik bhav amkam agro korit asat punn tanchem aikonk thoddim zannam toiar nant. Tuka aichem provochon koxem laglem?
Simao: Hem bhogsonneacher aslelem provochon mhaka sodanch avoddta. Amkam dusreanim bhogsonnem diunk zai oxem ami chintanv,punn jednam dusrim chuk adartat tednam tankam bhogsunk amkam avgodd zata.
Tadev: “Sat pavtti nhoim punn sot’tor pavtti sat”, him Jezuchim utram amkam kai bori adnia nhoim? Hixob dovrinastanam kiltle-i pavtti ami dusreank bhogsunk goroz. Punn Titiv sat kromank-acho ullekh kiteak kela?
Simao: Sat zaun asa Amchea Povitr Pustokantlo ek mhotvacho kromank(number). Hakach lagon tacho zaite kodden vapor korun, ullekh kelolo amkam mellta.Amkam somazant jieunk bhogsonnem divop bhov gorjechem.Teach passot Jezun amkam bhogsonnem diunk xikoilam,koslich xim(limit) dovrinastanam.
Tadev: Zaite pavtti bhogsonnem diunk avgodd lagta, kiteak tea monxean kelolea kortubank lagon amcho rag xizta.
Simao: Oi, chodd pavtti oxench ghoddta.Punn Jezun Apleak khursar marun itle tras ani vollvolle ditoleank bhogxile, tor ami-i Tachi dekh gheunk goroz.
Tadev: Kai borim khursar killailolea Jezuchim utram:BAPA BHOGOS TANKAM,TE NOKLLO TE KITEM KORTAT TEM
Simao: Jezu vorvim Devan amkam zonn ekleak bhogsonnem dilam, mhonnttoch ami amchea bhav-bhoinnank bhogsonnem diunk nibel gorjechem.
Tadev: ‘Amchea Bapa’ hea magnneantlean hem ami manun ghetanv kiteak ami oxem uchartanv,’ami amcher chukloleank bhogxitanv,toxim amchim patkam bhogos’.
Simao: Borem sanglem tunvem.Bhogsonnem ghevop ani divop sangatim ghoddonk zai,tednanch monachi xanti favo zaum ieta.
Tadev: Kaim karannak lagun bhogsonnem diunchem urta ani eke-meka sovem dusmankai vorsanchim vorsam toxich urta.
Simao: Dakttea ani sadea karannak lagun porian osleo dusmankaio toxeoch fuddem vetat.
Tadev: Amchea vhoddlea chukinchem amkam dusreamnim bhogsonnem dilolem zai punn zaite pavtti dakttea chukinchem pasun ami dusreank bhogsonnem diunk raji asonanv.
Simao: Hea Prachit Kallant amkam ek vhodd soeg-bhogsonnem gheunk Ani bhogsonnem diunk. Devan Amchea gineanar uzvadd ghalum. Oxench ghoddon eunk ami Devak prarthonam korumia.
Tadev: Borem Simao Titiv,vetam hanv,Collegik vochpacho vell zalo. Hea disanim gormi vaddlea ,tum chodd bhair ravonaka.
Simao: Boro korun voch. Hanv gorjecheo thoddeo vostu gheun,hi gormi chodd zaunche adim ghora porot  vetam..mog asumdi.

Felix Dias