Mogall Firgozkaramno,
2023 Novem voros suru zata mhollear soglle vatten umed ani kuxalkai. Hea vorsa odik kuxalkai asunk karann, fattlim don vorsam Covid-ak lagun roddun ani bhieun dis sarle. Kitem zatelem ani koxe dis sartele mhonn dubhav ietalo. Punn atam sogllem somadhan zaun kuxal zaunk soglleank purtem karann asa.

Adlea Korarant thodde pavtt pidda rog ieun ani chodd pavtt dusream desanche raza akromonn korun rajeank/porjek nirvaxi korun vhortale. Tankam pidda-pidd ditale. Dev ani devosponn korunk sot’tea legun tankam dinaasle. Oxem astanam porza roddun Devak ulo martali ani Dev tanchea uleak kan diun adharak ietalo. Tankam soddoitalo. Hi porza kuxal zaun aplea ganv-ghora vochun Devak dhinvastalo ani bhetto bhettoitalo.

Amkam nirvaxi konnem korunk nam. Punn pidda-rog zaun lok aplech bhitor nirvaxi zal’lo. Amkam eke torechi suttka meulea ani kuxal zaun novea vorsant bhitor sorunk ek vhodd soeg meula. Devan aplea udarponnan amkam anik ek novem voros dilam. Novea vorsa borobor anik zaiteo boreo vostu Dev amkam ditolo.

2023 Novea vorsant bhitor sortanam amche bhitor ek dhinvasnnechem mon zaum. Poile suvater Devak dhinvasum-ia. Karann fattlea vorsant amche sovem zaitem zaunk xoktalem. Devan amkam zaite pavtt vaittantlim nivarleant astelim. Mago nastanam amkam kitlim mhonn boreponnam dileant astelim. Amkam ghoddie khobor asa vo nam zait. Teach borobor amche sorvbonvtonni asloleam pasot dhinvasum-ia. Karann amcheanim dusrim nastanam ani dusreancho adhar ghe nastanam jieunk ghoddonam.

Pap Saib Francis hacho fattlea vorsacho ulo, “Communion, Participation, Mission” kanar gheun hea novea vorsant bhitor sorum-ia.

Soglleank tumkam Happy New Year 2023.

Dev tumkam rakhum ani samballum.
Tumcho Padr Vigar
Fr. Andrew Pereira