Tadev:  Dev boro dis dium tuka, Simao Titiv.

Simao: Tukai dium re, Baba Tadev.

Tadev:  Zaite dis tuji khoboruch nam. Tuji bolaiki bori asa nhoim?

Simao:  Devache kurpen bolaiki bori asa ….punn?

Tadev: Punn ani kitem? Oso chintest- dukhest tuzo sobhav kiteak tor? kitem zalam? .

Simao:  Hea novea vorsant kitleo vaitt ani bhirankull ghoddnneo ghoddtat teo polleun mhaka roddonk ieta.

Tadev: Kosli khobor sangonk sodtai? Rosteancher obsoeg ghoddleat ani kitlinch bhavam-bhoinnam sompun geleant, mhonn tum dukhi asai? 

Simao: Hem ek karann mhojea monank sotaunk. Rosteancher kitle mhonn marekar ani bhirankull obsoeg. Potrancher khobor vachun ani TV-cher polleun ang xirxirta.

Tadev: khorench polleun churchure distat. Thodde zann mottor-saikol vo ghaddio choloitanam chodd vegan choloitat ani dusreank trasant ghaltat. Thodde zann durgancher vo zhaddamcher ghaddio mokun, aploch jiv ogddaitat.

Simao:  Konn kortat pap ani konn ditat zap, osli hi amchi ghot zalea. Sintidan ani mannsugen cholounk amche lagim vell nam oxem dista. .

Tadev:  Tea bhair amche thodde tornatte choloitat tednam, tankam polleun bhirant ani akant sutt’ta. .

Simao:  Osleancher tanchea avoi-bapain vo ghorcheanim nodor dovrunk zai kiteak, karann nastanam dusrim addkollik sampoddtat.

Tadev:  Amche ‘police’ zaite upai ghetat punn obsoeg ghoddot asat.

Simao:  Hea rosteancher zatolea obsoegam sangata zaite viman-ache obsoeg zaun kitle zann kabar zale, lasun gobor zaun nanch zale.

Tadev: Oi Titiv, kitli dukhachi khobor hi. Eka khinna modem kitlim bhava-bhoinnam nanch zatat, tancheo kuddio vollkunk pasun kottin zata.

Simao: Punn mhaka vhoddantli vhodd dukh bhogli jednam eka bapain aplea khaxa bhurgeank jivexim marun nattak kelim.

Tadev: Kitli mhonn dharunn korni, nhoim Titiv? koxem puttvolem zait hea mon’xeak oxem hem pavl ubarunk? Koslem tori vhodd karann hantunt lipun astelem, hantunt dubhav nam.

Simao: Karann kosleim zaum, punn jiv kaddop chukichem. Khun korop itlem sompem zalam? mon’xeachea jivitak mol nam?

Tadev: Bhurgeancho khun kelo ani apunnuim atm-ghat korun somplo – tacho ghutt sompounk tannem proitn kelo.

Simao: Tanchea ghorabeant tontto upraslo zait, punn bhasabhas korun suttavo korunk zatalo, nhoim? Soglich duspott ani akho ghorabo dukhant.

Tadev: Eka-meka lagim uloun vo konnachi bori budh gheun, proxnn suttavo korunk zai aslo.

Simao: Devanuch amkam rakchim ani samballun dovorchim mhonn amchim magnnim ami chalu dovrum-ia.

Tadev: Oi amkam soglleank magnneachi goroz. Borem titiv, tum sintidan voch ani boro korun jivachi kallji ghe.

Simao: Borem baba, tum boro korun voch, mog asumdi.

Felix Dias