Mogall Firgozkaramno,
Adlea korarant Lev. 24/20 oxem mhonnta, “dantak dant ani dolleak dollo farik korcho.” Ani hoch bhag Jezu legun aple xikounnent ugddass korun novi xikounn dita. Jezu Aplea nimannea jevnna velo utt’ta ani aidonant udok ghalun xisanche paim duta. Pedru khaltikaien ani kirkollkaien aple paim duvunk diunk sodinam. Apunn Guru ani Suami zaun-ui Jezu apunn tanche paim duta zalear xisanim eka-mekache dunvche mhonn formaita. Ani oso Jn.13/15 hantunt ek seve chakrecho xisank hukum dita, “Hanvem tumkam kelam toxench tum-i korat.”
Dusreanim amkam zai toxem korunk zai mhonn soglleank dista. Hangasor ‘amkam zai’ hacher bhar ghatlolo dista. Hi ek soglleanchi sodanchi chalti sonvoim. Soglleank apleak borem kelolem zai, apleak vhoir ubarun dovorlolo zai. Punn nimannea jevnnar Jezu Apunn xisanche paim dhuvun, khalto zaun, dusreanchi seva korun dakhoita. Ani vhoili adnia, “Hanvem tumkam kelam toxench tum-i korat” mhonn dita. Hangasor ‘Hanvem kelam’, kitem kelam? Dusreanchi seva kelea, hacher bhar ghatlolo asa.
Hea mhoineant bhagevont Anna ani Joaquim, Saibinn maiechim avoi-bapui ani Jezuchim xepai-xemai hanchi porob kortanv. Hea somoiar “Grandparents” hancho dis kortat. Bhov thoddim xepai-xemai bhurginch koxim astat. Punn chodd korun xepai-xemai bhov mhatar-piraier zatat. Bhov thoddeank xepai-xemai pollounk mellonam. Ani bhov thoddeank apli natram pollounk mellonam. Ek-ekleachem noxib tem.
Hea vorsacho gonvllik vixoi, “Hanvem tumkam kelam toxench tum-i korat” hea July mhoineant mhataream sovem lavum-ia. Tannim aplea lagim zata ani zainam tem legun apleam bhurgeam ani natram pasot korun dovorlem. Tim nennar astanam, bhurgeank zaitem xikoilem. Tannim aplea pottak bhuk sonsun bhurgeank pottbor jevoilim. Tannim apunn paim-ianim cholun, bhurgeank ubarun bonvddailim. Apleam kuddik pornem guttlavun, bhurgeank borem-borem nhesoilim. Atam vell asa bhurgeamnim toxench mhataream sovem borem korunk. Tankam apurbai ani mog dakhounk. Tanchi seva korunk. Tednanch ki to vhoilo vixoi dor disa jieunk pavtoleanv.
Tumcho Padr Vigar,
Fr. Andrew Pereira