Tadev: Dev boro dis dium tuka, Simao Titiv.
Simao: Tukai dium baba, Tadev. Ami zaitea disamnim meule nhoim?
Tadev: Oi, amcheo suttio sompleo anim ami porot iskol ani collegint pavleanv. Tuka mellonk vell mellonk nam.
Simao: Tea bhair pavs-ui bhorpur poddlo ani marekar ghormi zatali ti tambli ani jiv dhados zalo.
Tadev: Pavsant amkam ek vegllech torechi urbha nirmann zata. Amkam bhurgeank tor mhovjen vell sarunk mellta. Ixtt-mitram sovem veg-veglle khell pavsant khellonk khoxalkai vaddta.
Simao: Sarkem tujem. Amchea bhurgeaponnar ami zaite sade khell khelltaleanv, te atam amkam dissonant.
Tadev: Koslea khellanchi khobor kortai, Titiv?
Simao: Kagot gheun daktteo ‘paper-boats’ korun ami udkant soddtaleanv ani sangatim movza korun spordha kortaleanv ani zachi boat jikta taka sadhe inam ditaleanv.
Tadev: Amkam teo ‘boats’ korunk kollonam anim zaitea amchea avoi-bapaink passun tem kollonam.
Simao: Hantunt guneanv vellacho. Aiz-kal konnank vell nam teo korunk. Soglem aitem, ‘ready-made’ ami sodtanv. Bazarant vikrek asloleo zalear ghoddie, ami teo vikteo ghetelim aslim. Tea bhair amkam ‘mobile’ meulear, anink kaim ier naka.
Tadev: Zankam teo korunk mahiti asa tannim amkam xikoilear, ami xiktoleanv ani dusreankui ami xikounk pavteleanv.
Simao: Sarkem tujem, Tadev. Hi pod’dot jivi urunk zai.
Tadev: Anink kosle khell asle, Titiv?
Simao: Ground-ar tor sodanch futtbol astaloch, punn ghara lagim, ghod’de gheun ami milamnim khellon amcho vell sartaleanv.
Tadev: Hanvem ghod’deanchi khobor aikolea, punn hanv kednanch khellonk nam.
Simao: Thoddea ganvanim ho khell bhurgim khelltat punn xharanim dixtti poddonam. Sadho khell zait, punn ekdom mhovjecho. Kazucheo bio dekun vapddun ami ek khell khelltaleanv.
Tadev: He soglle adleanche khell atanchea bhurgeank ek novol koxem. Thoddeanim hea khellanchi khobor aikonk nam, te khellonk nam, ani thoddeamnim te onbhovunk vo pollounk nam.
Simao: Vell mellta tednam hanv tuka ani tujea sangati ixtt-mitrank te khell dakoitam ani kitem korunk zai tem xikoitam.
Tadev: Borem Titiv, tuje adim fuddench upkar attoitam.
Simao: Tuka atam, iskolant hea vorsa soglem novem. Novo vorg, novi xikovpinn, novim pustokam, nove ixtt, soglench novem nhoim?
Tadev: Oi, Titiv, novem vatavoronn ani kiteim novem xikpachi urbha.
Simao: Hi xikpachi urbha tumchi sodanch vhaddom ani choddom. Tumkam xikoitat tem bore bhaxen mon laun xikat kiteak tumcho fuddar lamb asa. Tumchea avoi-bapaichim sopnam xarti pavounk tumi bhar gheun xikchem assa.
Tadev: Devache kurpen ani vhoddilanchea axirvadan ami amchem xikop kelear ami zoitivont zatoleanv ani somazant ek manacho zago ami apnnaiteleanv, hantunt dubhav nam.
Simao: Kai borem chintop tujem, ieram bhurgeamnim tuji dekh gheunk goroz.
Tadev: Borem Titiv, vetam hanv, pavsan kallok kela, pavs ieunche adim ghora pavunk zai.
Simao: Boro korun voch, Dev tujer axirvad ghalum.
Felix Dias