Mogall Firgozkaramno,
Henry Ford oxem mhonnta, “Coming together is the beginning. Keeping together is progress. Working together is success.” Konn mhonnta hinch utram Edward Everett Hale (1822–1909), Amerikacho boroinnar, kovi, itihaskar ani pastor hannem mhonnlolim mhonn. Him utram konnem mhonnlolim tem gorjechem nhoi, punn voilim utram konn jielo ani jieta tem gorjechem.
Aquem-cho atam choltolo Parish Pastoral Council fattlim sumar panch vorsam jielo ani jieta. Tea vorsa soglleo somudaieo vo wards novean nemle ani goroz thoim vaddoile. Thoim somudaieche fuddari vinchun kaddle ani tea uprant tanchi akarnni (formation) kelea uprant anik ek pautt tanche modem venchnnuk korun Parish Council ghoddunk vangddi vinchun kaddle. Tim sogllim challis (40) vangddi aslim. Thoddim eka-mekak legun ollkhonaslim. Tim sogllim ekthaim ieun tannim survat keli. Coming together was the beginning.
Parish Council-achem cholta tem panch-vem voros. Hea panch vorsam modem itihas-ant soglleam von chodd avgodd kall zalo. Ani karann mhollear don tem tin vorsam COVID19 ieun ghelem. Oslea vellar tannim aplea lagim zata te baxen somudaiechea vangddiank adhar sohokar dilo. Gorjevontank tim pavlim. Bhukeloleank jevonn dilem ani eksuriank sangat dilo. Piddestank ilaz dilo. Meloleank matiek laile. Oxem korun tannim bhes boro vavr kelo. Xabaski tankam. Addkollim modem legun tim sogllim ekthaim ravlim ani aplea somudaiechea vangddiank ekthaim dovorlim. Keeping together is progress.
COVID 19 ailem ani ghelem. Zaito lok tantunt piddent poddlo ani thoddo lok melo. Itloch vavr nhoim. Tache poilim ani tachea uprant Parish Council zaite torecho vavr korit asa. Tannim gonvllik (pastoral), seva-dhormik (liturgical), somajik (social) ani cultural vavr kelo. Hem sangunk ekdom kuxalkai bhogta. Tankam xabaski. He baxen vavr korun ganvant zaitea ailoleam noveam kuttumbank (new settlers) ievkar (welcome) kelo. Tankam aplim koxim ghetlim. Hi parish atam vaddot ghelea. Mhonntoch, “Working together is success” melloun ghetlam.
Atam novo Parish Council ghoddun hadddunk vell pavla. Adleanim kel’lo toso boro vavr novea somudaiechea fuddarianim korunk ek avhan (challenge) asa. November-achea mhoineant sogllea somudaianim (wards) dor eke somudaient chear (4) vangddi vinchunk hi poili venchnnuk zateli. Zata zalear konn boro so fuddari asa zalear soglleancher nodor lanvchi. Konn asa zalear tankam atanch luvan sangchem ani tanchem mon toiar korchem. Soglleam von odik gorjechem tem boro novo Parish Council mellunk aple ani dusreanche somudaie pasot chukoi nastanam magchem.
Tumcho Padr Vigar,
Fr. Andrew Pereira