Avoi viret bhurgem zolmona! Avoi viret bhurgem vaddona! Soimbachi avoi vo apnnailoli avoi bhurgeak vaddonk adhar korta. Anglotin mozbut zaunk, Avoi aplea bhurgeak aplea dudan vaddoita ani anglotin vadd zaunk taka borem jevonn dita.
Avoichim bhavnna aplea bhurgea sovem asta toxim dusreachim asona, zaum tim khudh aplea bapaichim vo bhav bhoinnachim, tea khatir bhurgeachea jivitant Avoi chodd motvachi. Amchem soimbh ollkhun ani monis kuddichi ghoroz manun gheun Jezun apli Avoi asli ti amchi Avoi korun dili.
Hea mhoinneant Agostache 15 tarker ami Saibhinn Maichem Sorga vornnem ani Indie-che suttkecho ami somarombh kortanv. Ami tor hea sonvsarant zolmotanv tem sodanch sonvsarant ravunk nhoi punn ami-i ek dis Sorginchea Rajant ami sasnnak ravunk, Jezu sangata ani Ankvar Morie borobor sodamkal jieunk ho amkam Devacho ulo ani dennem. Amchea kuddink mhukta ponn melltolem mhonn Ankvar Maria amkam bhorvanxeacho namunno zaun asa. Deva Bapan Ankvar Mariek Kuddi Otmea soit sorga veli toxem amkam ek dis hem Sorgimchem darzonnem favo zatolem.
Devan amkam rochleant ami jieunk, punn zolmank ietoli vonospoti, zadd pedd ani zonvoram toxim mon’xeam mortat zalear Ankvar Mariechem sorgar vornnem amkam bhorvanso dita. Ankvar Marie baxen ami ek dis sorgar veteleanv. Zoso Jezu Sorgar choddun ghelo toso to ek dis amkam vorunk to portun ietolo tea mhonnosoar Ankvar Mariecher nodor dovrun, ami ek dis tichea bharabor sorgar astoleanv mhonn Bhorvonxean jieumia.
Fr. Agnelo & Fr. Josely,
Tumche Gonvlli.