Ruzaiechi Bhokti: Bhorvanxeachi Matha
Outubrachea mhoineant ami Ruzai Saibinnichem devosanv kortanv ani amcher, kheritponni amcheam ghorabeancher zaitim Devachim besanvam zoddun ghetanv. Hi vhoddli bhokti mhunnlear Ruzai korchi rit, ami Ters mhunnun aileanv tem. Punn atam Ters (tisro vantto) nhoim, khorem mhunnlear Quarto (chouto vantto) to! Kiteak atam akhe Ruzaieche bhoktik vis gutt ani vis khonn asat. Ami ek pautt kortanv to chouto vantto.
Bhagevont Juanv Paulo II Pap Saiban “Rosarium Virginis Mariae” hi “Apostolic Letter” Povitr Sobhek dhaddun amkam (1) Ruzai mhunnlear kitem, (2) ami ticho koso foll kaddcho tem sangun, (3) ti odhik folladik zaunk upai ani (4) anik panch gutt ani khonn amkam dile. Oxem Ruzaiek soglle mellun 20 mister ani konn asat mhunn tannem porgottlem. Anik panch gutt dile te Uzvaddache ani te amkam fokot Brestarak mhunnunk laileat. Mhunntoch Ruzaeche gutt oxe vanttleat: Somar ani Son’var Sontosache, Mungllarani Sukrar Dukhiche , Budhvar Orkache/Vhoibovache, Brestar Uzvaddache ani Aitar sevadhormik kalla pormonnem; Adventachea ani Natalanchea Kallar Sontosache, Prachit Kallar Dukhiche, Paskam Kallar ani Sadhea Kallar Orkache.
(1) Ruzai mhunnge kitem? Padri Breviario magnnem kortat ani Jezuche soddvonnechea karyant vantto ghetat tech bhaxen griosteank Ruzai ek breviar: tantum Devache sasnnik euzonnent mhunnge amchea Soddvonddaran kelam titlem-i ami nyallun Saibinn Maim borabor ami soddvonneche bhageli, vantteli zatanv.
(2) Ticho foll koso kaddcho? Saibinn Maim bhorvanxeachi Matha, ami Noman Marie mhunntanv tedna, amchea sangata raun amkam soddvonnechea guttamni vantto gheunk Jezuxim vhorta. Dekhun Pap Saib sangta guttancher nyall vo dhean prarthon (contemplation) na zalear Ruzai otmo nasleli kudd koxi (a body without a soul); meloli Ruzai zateli. Dekun nyall vo dhean ekdom’ gorjechem.
(3) Odhik folladik zaunk upai. (a) Ek-ek khonn mhunnche adim guttancher dakttulo nihall korcho, (b) gutt ucharche bodlek vo to uchartoch taka lagu zatelim Xubhvotomanache xlok vachche, (c) Noman Marie mhunntana tea guttachi ghoddni (fact or event) Jezumhunnche adim ucharop, dekik, Tuka zolmola to Jezu.
(4) Anik panch gutt te Uzvaddache Mister: 1lo: Jordan nodint Joanv Snankarachea hatamtlean Jezu Povitr Snan gheta. 2ro: Udok aslem tem soro korun Jezu aplem deivik soddvonnechi khunna ugttaita. 3ro: Jivit bodlat ani Xubvortoman manun gheat mhunn porgottun Jezu aplem misanv suru korta. 4to: Aplem rupantor korun Jezu aplo sorgincho vhoibov ugttaita. 5vo: Aplea koxttam-mornnacho ugddas korun amchi soddvonn sonvsarant chalu dovorunk Jezu Porom’ Sonvskar ghoddta.
Amchea purvozamni sokallim uttun vo sanje soglim ekttaim asat tedna Ruzaichem devosanv kelem ani amcher ani sonvsaracher zaitim besanvam zoddun ghetlim. Saibinn Maiche bhaxen tem korun bhorvanxean Deva lagim magunk ti amkam bhorvanxeachi Matha