September-achea mhoineant sorginche avoicho zolm-dis monoitana/Nativity of Mother Mary, amcheam AVOI-ancho Dis/MOTHER’S DAY ami khuxalkaien somarombhtanv: avoianchea dennea khatir Devak dhinvastanv, amche khatir tannim kelam titlem-i monant haddtanv ani tanche sovem kherit môg dakhoitanv. Jivitachea dennea uprant AVOI amkam Devachem vhoddantlem vhodd d e n n e m m h o n n l l e a r h a n t u m k o sl i c h othitai/exaggeration asunk nezo. Oslea sandarbant thoddea AVOI-ancher ek dhanvti nodor marun Povitr Pustok koslem chitr amche mukhar dovorta, kitlem motv eke avoik dita, hacher lokx ghalum xem mhaka dislem.
Povitr pustokachim panam usoitana Adlea Korarant chouraxi/84 avoianchim nanvam amkam mell’ltat zalear Novea Korarant fokt tegam avoiank ami nanvan vollkotanv: Maria Jezuchi avoi, Elizabeth Zuanv Baptist-achi avoi ani Eunice Timot-achi avoi. Tea bhair Salome mhonn ek ostori amkam mel’ltta: apleam bhurgeam vixim vhodd sopnam ti sopnetali: apleam dogui putank – Jacob ani Zuanv – hankam Jezuchea rajeant uzvo ani dhavo zago di mhunn vinonti korunk Jezu xim ti aili. Hi ostori novean amkam Jezuchea khursa lagim dixttik poddta (Mt 27,56). Maria nanvachi anek ostori, Jacob ani Juzechi avoi tiche borobor khursa lagim amkam mell’ta. Tea bhair Avoik lagu zavpachem ek bhov motvachem utor amkam portun-portun povitr pustokar mell’ta ani tem zaun asa “avoicho kusvó” Adlea Korarant ullekh korpacheo/worth mentioning thoddeo avoiô amkam mel’ltat: poile svater amchi mullavi avoi EVE, Adanv-hachi potin ani Kain, Abel ani Seth-hanchi avoi. EVE hea utracho orth zaun asa JIV, “kiteak ti sogllea
jiveanchi avoi” (Ut 3,20). He amche poile avoichi gozal kortana tiche vixim borem kainch amkam mellona xem dista. Adanv-Even, dogaim zonnamnim Devachi adnya moddun, addvarlolem foll khaun sonvsarant patok ani moronn bhitor sorlem mhonn povitr pustokar ami vachtanv; tori astana hacho arop/blame bailecher kiteak, ti eklich guneanvkar koxi zatli? Oxi amchi ek porompora zal’li asa ki EVE mhonntta ti dusreank naddpi, patkant ghalpi ostori: oslem chitr amche fuddem dovorlam tem sarkem kai? Vô oslem chintop ani oslem chitr rochun haddop narivirodhponnacho/ anti-feminism porinam kai to? Bible-antlim him mullavim pustokam vachtana ek ami lokxant dovrunk gorjechem, ani tem mhollear him pustokam borovpeancho hetu amche mukhar ithiasik ghoddnukô/historical events dovorunk nhoi, punn tanche baxen ani tanche sonskrutaiek lagu zatolo akhar diun kaim motvachim sotam jahir korunk.
Dusri ek ullekh korpachi avoi zaun asa Rebeka Izak-achi potin, Esau ani Jacobhanchi avoi. Judevanchi dhormik porompora tika ek promannik ani provadik ostori mhonn lekhta. Vhoddlea putak favó axill’lo bapacho axirvad ti choriam, kuddo zal’lea Isak-ak fottoun aplea dhakttea putak, Jacob-ak zoddun gheta ani Esau-che svater dhaktto put daiji zaum so korta. Voilea-voir nodor marlear Rebeka ek naddbudhichi ostori amkam disum iet, punn tiche vorvim Devachi ievzonn sakar zaunk pavta karann, xastra pormannem oxem ghoddonkuch zai aslem, “…ani malgoddo dhaktteachi seva kortolo”(Ut 25,23). Tea bhair Esau aplea pottachi bhuk marunk Jacoban randloli tambddi dall khaunk aplo hok’k poiloch soddun dita, “He porim aplea malgoddeponnachea hok’kachi beporva keli” (Ut 25,29-34) Ami promannik zaum kirkoll patki zaum, ami fokt hatiaram Devachea hatant; to kumbhar, ami mati: amche vorvim Dev apli soddvonnechi ievzonn fuddem vorta mhonn ami monant dovrunk goroz. Novea Korarant dogi xrextt avoiô amkam melltat: Elizabet, Zuanv Batist-achi avoi ani Maria, Jezuchi avoi. Elizabet ani Zakarias ticho poti, hanchi khobor korun povitr pustok amkam sangta tim dogaim “chukoinastana Sorvesporacheo soglleo adnia ani formavnniô pallun, dogaim Devache nodre mukhar dhormvont aslim”(Lk 1,6) Bhurgem-ball naxil’lean apnnank kitlo beman bhogunk poddlo tem tich Elizabet amkam sangta. Xekim tanchea magnneank kan diun Dev Elizabeticho kusvo sufoll korta, ani tika zolmol’lo ojapancho bhurgo Soddvonddarachi vatt toyar korunk oronneant vochun aplem biradd korta. Mariek Jezuche avoik aplea ghorant ievkar diunk ani tin mhoinne aplea Dhoniachea avoichi seva gheunk tika bhag favó zalem mhonn Elizabet khuxalkaien murghot’tli. Devachem kherit boleponn svikarloleam dogui avoiam modhem zaito bhasabhas zala astolo, apnnem khaxa onbhovl’li Devachi korunnai dhinvaxi kallzan eka-mekak tannim vanttlea astoli… Maria, Jezuchi ani amchi sorginchi avoi, patka vinnem gorb-sombhovloli, soglleam rochnnam modhem xrextt Devachi rochna, ostoriam modhem sudoiv ani Jezuchi poili pattlavdar. Sant Bernard Mariecho bhokt latin baxen mhonntta, De Maria nunquam satis/Marie vixim, tichea gunnam vixim, tiche sopurnnaie vixim favo titlem sangunk amchean kodinch ghoddchem na. Ani bhagevont Louis de Montfort, ek vhodd misionar ani Mariecho bhokh oxem boroita, “Devan sogllim udkam eke zagear ekthaim dovrun taka MARE = somudr mhonn nanv dovorlem; tech porim Devan sogllim otmik dennim, soglli kurpa ekthaim korun MARIA, hem nanv dilem… Povitr pustokant avoi-ank ek kherit manacho zago asa ani Devan dil’le Somurticho chovto updes bapaik ani avoik man diunk formaita.
Mhonneanchem pustok AVOI ek gunnest, huxear, tozvitechi ani kallji ghevpi ostori koxi amche fuddem dovorta, tichim bhurgim ani ghorkar tichi ttoknnai kortat (Mhon 31). Bhurgeamnim aple avoi-bapaik khuxal dovorchim ani tanche zanntte pirayer tancher visor ghalcho nhoim mhonn sangta. Dusre svater provadeanchea borovpant avoicho kherit gunn mhollear BHUZVONN divop, aplea bhurgeank tanchea koxtt-trasanim lagim ravun tankam ghottai ani boll divop, tankam khuxal dovrop, tanchem dukh aplem korop (Is 66,13) Tisre svater avoicho kherit gunn Sant Paulu amchea fuddem dovorta, to zaun asa Avoi amchi poili bhavartachi xikxok/our primary teacher of faith.
Timot nanvancho tacho ek xis zo Ephesus prantant ek bisp koso aplo gonvllik vavr kori, taka chitt boroun Paulu mhonntta, “Dhong-naslolo tuzo bhavarth mhojea monant asa. Tuje adim Lois tuje ajek ani Eunike tuje avoik also toch bhavarth tuka-i asa mhonn mhaka kosloch dubhav na”(2 Tim 1,5) Devak ami Bap mhonn uló kortanv, zanv sevadhormik ritimnim zanv amchea khasgi magnneant ani Jezun “Amchea Bapa”, hea magnneant Devak osleach nanvan uló korunk xikoilam; tori astana provadeanchea borovpamnim Devak eke avoichim bhanvnnam, avoichem kalliz ani avoicho sobhav dil’lo ami polletanv:
a. “Konn ek bail aplea dudachea ballak visrot kai?…Punn ti porian visrot zalear Hanv tuka kodinch visorcho na!” Is 49,15;
b. “Zoxem konn eka ballak aplea polea-xim uklun dhorta toxenxh Hanvem tankam kelem, ani oddov ghalun taka Hanvem jevonn vaddlem”(Ho 11,4)
AVOI zavop mhollear ek bhov vortem apovnnem ani Avoi mhonnttat ti amchea mogall ani doiall Devacho rupkar, Tachench mukhamoll hea sonvsarant: hem sot soglleam Avoi-anim kedinch visronk favona. Bhurgeanchea povitr-snana somoiar avoi-bapaichi zobabdari aplea bhurgeam sovem povitr sobha thoddeach utramnim tanche fuddem dovorta: “Bhavartan tankam lhan-vhodd korunk, oxem tannim Devacheo adnya pallun, Jezu Kristan amkam xikoilam tea pormonnem, Devacho ani peleacho Mog korunk” (P
Snanachi Rit, no.39)
Fr Anil Kumar