Vorsachea xevottak pavtana amche borobor hea Sonvsarant poinn kelam, amche sovem khub boreponn, môg ani huskó dakhoila tancho ami mogan ugddas kortanv, tanche pasot magtanv, tanche fondd nitoll korun fulam ghaltanv.
Morun geleant tankam man divop, tancho ugddas ani tanchi puja legun korun tankam amchea jivitant eke baxen hajir dov’rop: osli chal purvileam sonskrutaiam modhem/in ancient cultures odikuch dixtti poddta.
Mel’leam sombondhim dusri gozal mhollear tanchi khobor kortana vô konna chea-i mornnachi mahiti ditana movall utrancho/euphemism vapor ami kortanv, dekhik to piddear zalo, ti bhair poddli, to ghelo/sompló…Mel’lea mon’xa vixim ulovpachi hi poddôt, ghoddunk favó naxil’lem kitem tori ghoddlam, oxem mhunnonk sodhta.
Adim lokam modhem/among primitive people eke vatten purvozanchi bhokti ani dusre vatten bhirant spoxtt zata. Purvozanche otme xant korunk zai, na tor amchea jivitant koslem-i tori odruxtt ieunk xokta: oslem chintop aiz legun amche modhem dixtti poddta. Somajik mollar fattim axil’lea prantant adivasi loka modhem zoim ek misionar koso hanv gonvllik vavr kori thoim oslem dhoronn zaite pavtt hanvem pollelem. Jedna ek ghorabo Kristi dhormant bhitor sorunk toyar zatalo tedna iadnik dev-sondexkaram sangata tanger bhitor sorun tanchea ghorant magnnem korun ani povitr udok xinvravun tanchea ghorachi xuddhi korunk zai asli. Osle ritint tanche gharant dovorlele dhaktte matieche buddkule/small clay pots kaddun nodint vo zonglant uddoitaleanv. Heam aidonnamni aplea purvozank ghorcho lok jevonn dovortalo. Hi rit chalu astanam thoddo lôk, bhov kor’n bailô, bhirantin jintt marun zomnir xevtton poddtaleo ani vhoddlean roddunk lagtaleo: khub bhirant ani akant tancher ietalo, purvozanche otme tankam vaitt korit, tancher kosleim noxtt haddit, oxem tanchea monant ietalim. Punn Kristi bhavartachea utramnim tankam dhir ani ghottai dilea uprant tim xant zatalim.
Povitr Sobha ek huskean bhorloli avoi mhonntoch, aplim bhurgim mornnak lagun dukh ani sontap kortat tedna Devachea utra vorvim bhorvanso ani bhuzvonn amkam diunk sodhta.
Mornnache Ritint Deva Utor buzvonnechim ani bhorvanxeachim kolponam amche mukhar dovorta. Zannvaiechem pustokant amkam oxem mellta: “Promannik mon’xanche otme Devachea hatant asat…Pixeanchea dolleam mukhar (tanchem moronn) ek noxtt dislem… punn tim aplim xant asat” (Wis 3,1-3). Ani Sant Paulu Thessalonkarank boroun mhonnta, “bhorvanso-naslolea heram mon’xam porim tumi khonti bhorit zaina zaunk, morun geleant tanchê vixim sot tem tumi zanno zal’lim mhaka zai. Jezu melo ani punorjivont zalo mhonn ami tôr sotman’tanv, têch porim Jezucher bhavarth dovrun meleant tankam Dev Tachê borabôr haddtolo. (1Th 4,13-16).
Mhonntoch mornnak vo morun gel’lea amchea bhav-bhoinnink bhievpachi goroz na. Tankam fokt amchea magnneamchi goroz. Dusre svater moronn polleun zaite monis aplem jivit bodlunk pavleat: sonvsari vostunchem polke ponn, kitem togta ani kitem sorun veta, hachi zannvikai tankam mel’lea uprant novea jivitachi vatt tim dhorunk pavtat.
Amchea mel’leam bhav-bhoinninchea otmeank sasnnacho visov di mhonn Deva lagim magtana, ani “atam ani amchea mornnachea vellar amkam pav” mhonn Saibin Maiek uló kortana zannvaien jivitachim pavlam ami marum-ia, sorun vetat toslea vostunk patt korun togtat tosleo vostu apnnaunk ami pott’tidken vavrum-ia.
Fr Anil Kumar