Otmik Bhonvddi ( spiritual Tour)
2025 voros Utsovik Voros ani hea utsovik vorsak “ Bhorvanxeancho Yatrekar” ho vixoi ghetla. Ami sogllim hea sonvsarant yatrekaram, sangatan sorgim Rajeachi vatt bhorvanxean choltanv. Hench monant dovrun ami Saude Saibin, Aquem, Legio Mariechim vangddi sangatan otmik ani bhorvanxean bhorlolim yatram korunk ami dusrea Legio Mariechea vangddeank bhett korunk ani bhavartachi govaiki diunk, Piedade Saininichi firgoz, Divar, hangasor gelim. Amcho Otmik guru and padr vigar Fr. Agnelo Rodrigues ani Padr Kur Fr. Josely Rocha hanchea marg dorxona khala ami hem pavl fuddem marlem.
Sumar sokallchea 11.30 vaztam ami Old Goa thaun ferrin proves korun poltoddi pavlim ani amkam bhoro ievkar mhevlo amchea Padri Leslie Gomes-acho.
Fr. Leslie (amcho adlo Padr Kur), amkam poilo gheun ghelo Redemtor Saibachea Kopelant (Lord Redeemer Chapel). Tuimsor aslim Piedade Saininnichim legianvanchim vangddi , zancho Fr. Leslie Otmik Guru. Tannim amkam bhoro ievkar dilo. Tim sogllim mellun 12 bhoinni aslim.
Ami donui zome eka meka kodden vollok korun ghetli ani ami amchim Caetana Magnnim kelim. Fr. Leslien amkam bhov toddi mahiti hea Redemtor Saibachea milagrincher dili ani amcho bhavart vhaddoilo ani sogllim bhavartan Redemtor Saibachea paianxim ravlim ani uprant amkam refreshment diun dhados ani susegad kelim.
Hem sogllem zata mhunnosor sumar 12.45 p.m. zal’lim ani Fr. Leslie amkam aple firgojent gheun ghelo, Our Lady of Piety Church (Piedade Saibinichi Firgoz). Thoim ami jedna pavun sorlim ek attvech bhaxecho sontos bhoglo kiteak ami voir dongrar aslim ani dekhavo bhov sobit distalo (a beautiful scenary). Hantunt amkam Devachem asnnem dislem ani amchim kallzam dhados zalim.
Amkam Fr. Leslien aple firgojent vhorun adleo misacheo vostu, vhoddle Christmas murteo, zaitim Rozarachim kontam, padrichem nhesop ani firgojechi sobitai zoxe porim altar, sant bhokt ani tanchem khaxeleponn dakoun dilem ani uprant tannem magnnem kelem.
Ani itlench nhoi Fr. Leslien amkam mini meuseumachi khobor sangli. Fr. Jacome Gonsalves, Bhagevont put Divar ganvcho, zo Sant. Juze Vaza sangata ravun vavurlo. Srilankent tannem Jezuchi bori khobor porgottli, ani to atam Sant zavpachea panvddear asa.
Amkam ek bhag favo zalem hea Mahan Bhagevontachem ghor asa, (atam tem Divar iskolak bhettoilam) tem polleunk ani amchi ji bhavartachi yatra ami choltaleaum ti khorich ek attvoch rong gheunk lagli ani ami soglim Otmiktaien hi chantt marit ravlim.
Sumar 1.30 p.m vastam amkam Fr. Leslien aplea ghorant vhelim ani amchi pottachi bhuk marli, borem ruchik jevonn amkam vaddlem. Sogllim bhorim khuxal zallim, illoso vhell suseg ghetlo ani laglim fuddem amchea vattek.
Fr. Leslien amkam vhelim Santo Cristo Church, Vanxim, tuim vochpak ferry zai poddta. Tuim ami bhavartan Jezuchea kakluticho ters kelo ani bhair sorlim St. Mathias Church, Malar zuim amcho adlo padr kur Joao Coelho Padri Vigar asa.
Uprant ami ghelim zantteanchea ghorant (Lar Santa Margarita, Old Age Home). Hem zantteanchem ghor amcheo madri bhoinneo choloitat (Poor Sisters of Our Lady) thoim ami jedna bhitor sorlim tednam soglim zanttim bhailo ani dadle eka vosreant bhosun aslim( sumar 19 inmates).
Amkam madrinim bhoro ievkar dilo ani zantteanxim vhelim, ami tanche kodden tanchi khobor ghetli, uloilim ani amche adle mandde ghavun tankam borim hansoilim . Tim amchea sangata ghavunk laglim ani amkam tannim adlim parkonnim pasun ghatlim. Tanchea sangata vhell koso sorlo to amkam kollunkuch nam, uprant ami tanchea sangata chav pielim ani tankam adeus khelo. Madri Bhoinnanim amkam Dev borem korum mhunta mhunnosor 5.30 vazlim ani ami ghora ievpak bhair sorlim. Fr. Leslie amkam Divar Ferry kodden pavovpak ailo ani ami soglleanim taka dhinvaslo kiteak tannem sokall meren tem sanje porian amchea sangata ravun amchi otmik bhonvddi follabhorit zaunk adhar dilo.
Uprant ami Old Goa Bhainkodde ghelim zuim St. Francis Xavier navunk vhetalo. Ami bhavartan tea bhainchem udok pielim ani bhattleanim bhorun amchea ghorcheank ghora haddlem ani laglim amche ghorche vattek. Sumar sanjechea 7.00 vaztam ami amchi Otmik Bhonvddi St. Sebastianvachea Firgoje lagim sompoili.
Jeanivie Da Costa (Odheox)