Mogall Firgozkaramno,
July mhoineachea poilea sumanant akhea Bharotant bhurgeank gheun ami mellot thoim sorkari kocherinim Vanmahotsava monoitat ani zaddam rovunk uskaitat. Ekdom bori vost ti. Bori mhonnta tednam don torenim ti sonvoim bori. Eke vatten zaddam rovun vatavoronn ekdom bore toren samballunk ek soglleam von boro upai. Uskar gheunk nivoll oxygen toiar zata. Thonddai samballta. Zomnichi mati ghott dovrunk borem zata. Dusre vatten zaitim zhaddam mon’xank khaunk ruchichim follam toiar korta.
Zomnint lhan so fond kaddunk ani tantunt lhan-xi zaddachi rompi lavunk ekdom sompem. Punn tea zhaddak goroz tem udok ani sarem vella-vella ghalunk bhov toddeank ugddas zata. Teach karannak lagun Vanmahotsava kortanam vorsan-voros teach suvatecher zhadd rovunk monis dixtti poddta. Fottu bi kaddlo zalear, hea ani fattlea vorsacho fottu ekuch koso dista.
Dusre vatten soglleam von odik bore toren Vanmahotsava kortat te amche xetkar. Vorsan voros te kitle-xe acres xetam laitat, tacho poramos korunk vella-vellar udok soddtat, sarem ghaltat, noddnni kaddtat ani kidd laglear vokod martat. Pausacho bhar zaum vo votacho tap marum, te aplea lagim zata te baxen xetancho poramos kortat. Tanchea vavracho foll mellunk kitli mhonn “uncertainty”. Punn hem chintun ekloi xetkar fattim ravonam. Kitle mhonn kalljidar te. Xabaski tankam.
Sonvsarachem ‘Development’ mhonntat tednam hanga thoim vhodd building bandtat. Vhoddle karkanne (factories) bandtat. Punn gorjechem tem khann jevonn toiar korpant bhov thoddem “investment” zata. Konn babdde gorib monis zhorun morun xetant pik toiar kortat ti mat khaunk soglle toiar zatat. Kitle pautt paus poddlo zalear poddlo. Kitle pautt ispa bhair paus poddun sogllem vanvun voita. Kitle pautt paus unnem poddun xet sogllem sukun morta. Osleam xetkareancho konn ugddas korta? Borem ruchichem jevonn mezar bosun jevtanam phone gheun fottu mat kaddunk konn visronam.
Hea pausachea disamnim xetant bizun vavr kortoleam xetkareancho ugddas korum-ia. Tanche pasot Devak argham divum-ia. Motorant bosun provas kortanam xetant vavr kortoleam lokacher nodor ghalum-ia. Kednaim zata zalear ek-don minot thoim xeta dhodder tambun xetkareancho vavr vakhannum-ia.
Tumcho Padr Vigar,
Fr. Andrew Pereira