Mogall Firgozkaramno,
Tumkam dor kuttumbak ani dor firgozkarak ani Fr. Andrew Pereira tumchea adlea Vigar-ak, maie-mogaecho nomoskar
Novi Firgoz, novo lok, novem vatavoronn, noveo chali, riti, veglleo chali riti, sogllench novem. Zhadd-pedd, Mhadei nodhi, vall, sukhnim, zanavoram hancho sangat ani avaz aikun tin vorsam Satari vattaran (Taluka) hanv jielom ani gonvllik vaur chodd o-kristi loka modem kelo. Atam vatavoronn dusrem, lok dusro. Birondem, Satari avaz ietalo punn to sukhnneamcho ani zanavoramcho, hanga avaz ieta motor gaddiancho ani modianim ratri ‘train’ veta tichea horn-acho.
Amchi ayu(age) vaddta titli amchi kudd oskot zata. Adim dhanvtalom, football khelltalom tachi iadgiri (trophies) mhojea room-ant asat ani ek Aquemchi football jersey pasun asa.
Novo zago zal’lean ek ek dam hanv bizle-cho button sodtam uzve vatten punn to asa dave vatten. Zaum room-achi, vostumchi ani lokachi ollokh zaunk vell vetolo tea mhonnosor tumchea adharan hanv firgojecho vaur fuddem vortolom. Padr-Kur ani hanv Firgozkaramchi ollokh korunk ami tumche bhettek ietoleanv.
Amkam dor firgozkaram gorjechim zaun asat. Suddsuddit vaur kortat tim vo ghorant mhatarim asat tim sogllim amchea mogachim. Eka hatan tallio pettonant. Dusrea hatachi goroz asta. Ami tumche baxen monis, eka kuttumbant zolmoleanv, amkam bhav bhoinnam ani soirim ixtt mitram asat. Ami padrichea ghorant ravtat ani ami asosor tem amchem ghor zaun asa. Ami borobor Padr kur ani hanv jevtanv-khatanv, ani sangatim Tersachem magnnem kortanv.
Padr-kur ani hanv ami dogui Jezuche sevek amchem jivit, ami vomptanv. Tumi amchim mogall firgozkaram sodanch amchea magnneant asat. Tumche sevek ami hajir asteleanv, tumchi dhormik seva korunk Jezun amkam apoileat ani makhleat. Tor Firgozkaramno Fr. Josely ani hanv Fr. Agnelo, Sant Sebastiao-ache mozotin tumcher Dhonia Devacho bhorpur axirvad magtanv.
Fr. Agnelo – Fr. Josely
Tumche Gonvlli.