Sotmantam hem magnnem uchartanam, ‘Bhoktancho Ektar’, ami mhonntanv. Bhoktancho Ektar, amchea bhavartachem sot. Bhag. Paulu apurbaien, ‘Bhokt’ ho xobd Kristi somudaianchea vangddeank vapuddta. To “Akaient ximpoddleleam bhoktank” (2 Kor 1:1), “Efez xarant asleleam bhoktank” (Efez 1:1), Dhormdutancho Itihas bi Kristachea pattlaudarak Bhokt mhonnta. Dor ek Kristanv zo Povitr Snana vorvim Jezunt ek zala to hea utrachea survechea ortha pormonnem, Bhokt!
Ektar (Communion = union with), ami sotmantanv soglleam sovem, zancheant Povitr Atmo bhiradd korun asa, tanche modem sombond asa, pritimog asa ani te eka-meka thaim ekcharan asat. Ho ektar poile suvater, sonvsarant jietelea Kristi bhavarteam thaim asa. Morun bhagevontponnacho mukutt zoddun, Devak rup rup polletat, atam zoitivont Povitr Sobha zaleant, tanche sovem ho ektar asa. Toch ektar koxtoutele Povitr Sobhe koddem-i asa, ji Povitr Sobha vo jiche vangddi hea sonvsarantli poinn sompoun utorleat punn azunuim sorga rajeant paunk nant. Te bi amche Povitr Sobheche vangddi ani tanche thaim bi amche sombond asat ani tanche sovem amchi zababdari asa. Tanchi poinn sompli punn tancho haves Devak rup rup polleupacho azunuim tannim zoddlo nam. To tannim zoddum ieta punn tanchech ostogim atam tanchean kainch korunk zaina, tanche pasot ami korum ieta. Amcheam magnneam, teagam ani borea kornneam vorvim ami tankam soddvonn zoddum ieta. Amcho ektar tanche sovem, ted’na odik follvont zatlo. Kiteak tim legun – porgotorintlim- bhoktanchea ektarant asat.
Pri Agnelo – Pri Josely.
Tumche Sevek.