Retropos nanvacho ek monis aslo. Tachi Avoi Kristanv ani Bapui onbhavarti aslo. Ho monis Anglottin lamb, rund ani bollixt aslo. To sodanch mhonntalo hanv mhojem jivit oslea monxank bhettoitolom zo konnakuch bhienam. Taka kollon ailem ki thoincho Raza konnakuch bhienam ani zaitim zuzam to jikla. Retropos tea Raza-xim ghelo ani aplem mon taka sanglem. Razan taka ieukar dilo ani apnna sorxim dovorlo. Ek dis Razacho ek kovi apli kovita taka vachun dakhoitalo. Kovita devcharachea vaitt kornneachi asli. Jedna jedna kovi devcharacho ul’lekh kortalo tedna tedna raza bhietalo, tachea hat-paiank kampero bhortalo. Hem polloun Retroposan Razak karonn vicharlem. To mhonnunk laglo. ‘Hanv konnakuch bhie na punn devcharak bhietam’. Tem aikun Retropos devcharak sodunk ranant ghelo. Taka ranant devcharache xipai mevle. Tannim taka devchara-xim vhelo. Devcharan taka aplea Rajeant ieukar dilo.
Ek dis te ranant bhonvtanam tankam ek khuris dislo. Khursacher nodor poddtoch devchar bhielo ani tedna hea monxan taka karonn vicharlem. Devchar sangunk laglo, ‘hanv konnakuch bhie nam, punn tea khursar aslolea Jezuk bhietam’. Hea monxak kollon ailem ki To khursar humkollta to chodd bollixt ani konnakuch bhie na astolo. Tannem devcharak thoinch sanddun, to Jezuche sodik ghelo. Zaitea disam uprant taka ek huxar Devak bhuzpi vidvan meulo. Tannem Retroposak nodiche deger vhelo ani sanglem hi nodi paar korunk lokak zaite tras zatat, dekhun tum hi nodi paar korunk lokak adar kor. Ani hi lokachi seva kortana tuka Dev mellonk xokta. Tannem apleak ravunk ek dakttem ghor kelem ani ietea-vetea lokak nodi par korunk adar kortalo. Oxem vorsam ghelea uprant ek rati tachea ghora bhair taka ek avaz aikunk ailo. Nodi Paar korunk apleak adhar kor mhonn konn taka apoitalo. Ho monis bhair ghelo. Bhair ek dhakttulo bhurgo apleak nodi par korunk modot magtalo. Tannem bhurgeak aplea khandar ubarlo ani to nodint pavlo. Nodichem udok cholta-cholta voir-voir ietalem ani khandar aslolo bhurgo zhodd- zhodd zait vetalo. Tedna Retroposan taka mhonnlem “Hanv akhi prithum mhojea khandar vhortam-xi mhaka dista”. Tedna tea bhurgean taka sanglem “nhoich tum akhi prithum vhortai punn ti prithum zannem ghoddun haddlea takai tum khandar bosoun vortai, Hanv Jezu Krist”. Fuddem Jezun taka sanglem, “Aiz thaun tujem nanv Christopher, mhonnge zannem Jezuk aplea khandar bosoun poinn kelem (thou hast borne the Christ upon thy shoulders)”. Fuddem tannem Bautizm ghetlo ani Christopher hem nanv vaprunk laglo. Hoch to St. Christopher. Christopher mhonnghe sogllea (Akhea) Jezuk aplea bhitor ghetlo (Christ bearer).
Christopher hea Sant-achem fest 25 Julai ani hea disa gaddiancher – dhanvteriam-cher (vehicles) firgozamni axirvad ghaltat.
Sumathi Dias