Natalancho kall amkam soglleank khub umollxiken/ with expectation vatt pollovpacho kall: Jezuchea zolmachi khuxealkai, amchea kuttumbache purai zogant ximpoddlole vangddi ektthaim zavop, Jezuchea zolmachem sthan/ghotto ani noketram toyar korop, consvad ani dusreo khavpacheo vostu toyar korop adi. Jezuchea ghotteant sobit imaji ami dovortanv ani bore baxen to nettoitanv
Natalamchea ghotteacho itihas polleunk gelear Jezuchea zolmacho dekhavo poilech pavtt rochun haddpi Assisi-cho Sant Francisk. Povitr Zageank/Holy Land bhett kelea uprant 1223 vorsa Greccio nanvanchea xarant Jezuchea zolmacho dekhavo dakhounk taka preronn ailem. Punn Fraciskan ek jivó ghotto toyar kelo. Eke dholint/cave sukhem tonn manddun gorvam dovorlim ani ganvchea lokak Maria, Juze, ballok Jezu ani gorvam rakhnne koxim nesoun tea zagear Natalancho dekhavo prodorxit kelo.
Jezuchea zolmachi sadhi, lhanvik ani durboll poristhiti vorvim Frasisk- achea jivitacher kholaien ek cchap poddlem xem dista/left a deep imprint on his life. ‘Assisi-chea ‘gorib mon’xan’/Poverello from Assisi purai monan apnnail’lea jinn-poddoticher nodor marlear/looking at the life- style that he embraced hem bhesbor spoxtt zata. Tachea jivitacho ek hetu mhollear sadho, lhanvik ani gorib zaun amche modhem denvun ailolea Jezuchi porghottni korop.
Bhasail’lea Soddvonddarachea zolmachi khobor sangtana Lukas xub- vortomankar thodde topxil/details amche fuddem dovorta. Tantunttlo ek mhonnllear halinch zolmak ail’lea ballkak revddailole kopdde. “Taka falliamnim guttlaun khavnnent dovorlo” (Luk 2,7). Hea lhan topxilak to khaxelem motv dita, oxem dista. Gorvam raknneank Bethlehem xharant ghoddlolem novol porghott kortana devdut tankam ek khunna diun mhonntta, “hi tumkam khunna: falleamnim guttlail’lo ani khavnnent dovorlolo tumkam êk ballôk melltolo” (Luk 2,12).
Avoin aplea bhurgeak ‘falleamnim guttlavpant’ koslo tori gutt lipun asunk zai. Ho supurlo osokt ani kirkoll ballok zori tor deivik soimbacho, Devacho Put ani amcho Somi tori astana to soglleant amche sarkelo zalo,amchi gôt tannem purteponnim apnnaili (polle Heb 2,17) ani tachem Devponn samkench lipun urlem. Tache bhonvtonnim kosloch voibhov dixtti poddona nhoi mhonn deivik soimbachi koslich kitt legun na: falleamnim taka guttlaila, poramos korunk ani kallji gheunk nibel goroz axil’lea khoincheai lhan bhurgea porim to zalo.
Lukachem xubvortoman dusrea ek ‘guttlavpachi’ khobor korta: “Jezuchi kudd…eke olin guttlaili ani…somadhint Taka dovorlo”(Luk 23,52-53). Eke vatten Maria, Jezuchi avoi, aplea ballkak ‘fallianim guttlaun’ ghotteant dovorta ani dusre vatten Arimateiacho Juze Jezuchi jiv naxil’li kudd olin guttlaun somadhint dovorta. Bhagevont Paulu aple ek chittint hacher odhik uzvadd ghalta: “Devachea soimbacho To, punn Devachi gôt Tannem axen samball’n dhorunk na. Apnnakuch khali kelo, mon’xachem sarkem ghetlem, gulamacho akhar dhorlo…(Fil 2,6-8). Pallneant taun somadhint porean/from cradle to tomb amche sarkelo to zalo.
Tisre svater ballkak “falliamnim guttlavop” hantum ankui gutt liplolo asa gai? Tachi avoi ani bapui, Maria ani Juze, hanchea hatantlean ghetleli soglli niga ani poramos/tender loving care, aplea malgoddea sovem sogllo tancho mog ani opurbai kunnaita.
Hi suchnna Adlea Korarantlean amkam spoxtt zata: Job 38,8-9; Zan 7,4; Ez 16,4(he tinui zageancher ‘falleamnim guttlavpachi’ gozal asa ani dhakttea bhurgea sovem dakhoil’lolo mog, poramos ani konvallaiecho ul’lekh kortat).
Natalancho kall ani Jezuchea zolmachi porob amchea darachea umbrar asa. Tea kheddea ganvantlea gonvlleam baxen ami-i “Bethlehemak vochum-ia ani jem kitem ghoddlam … tem polleun ieum-ia.” (Luk 2,15). Hea osokt ani kirkoll bhurgeachea rupan amche modhem biradd korunk ailolea Soddvonnddarak vollkunk bhavartache dolle amkam asunk goroz. Tachi avoi Maria ani bapui Juze, hannim konvallaien tacho poramos kelo ani dhakttulea bhurgea sovem korunk poddta titlem-i bhesbor kelem dekhun ho sasnnik Devacho Sôbd khoreponnim ‘monxacho put’ zaunk pavló.
Fr. Anil Kumar