Novea vorsak ami survat ditany Ankvar Maria, amche sorguinche avoicher nodor ghalun, “Bhagevont Maria Devachi Mata”, hi sevadhormik porob korun. Je porim ek dhakttem bhurgem aple avoichea hatak dhorun poilech pavtt cholunk lagta tech baxen sorguinche avoichea hatak dhorun novea vorsant ami panvlam ghalunk sodhtanv.
Kaim vorsam pattim amchea gonvlli bapan amkam ho vixoi dil’lo:
“Hanvem tumkam kelam toxench tumi-i korat”. Jezu aplea bara apostlam sangata nimannem jevonn kortana aplea xisanche paim dhuvun zalea uprant heam utram vorvim tankam lhanvikaien kel’le sevechi vatt dakhoita…
Eke vatten Jezuchim utram aplea xisank “Hanvem tumkam kelam toxench tumi-i korat” ani dusre vatten Saibinn Maïnchim utram chakrank Cana ganvchea logna-vosreant, “To tumkam sangit titlem-i tumi korat”, anche modhem ek kherit ani okhondd soirigot spoxtt zata. Povitr Satolleant khursar umkolltolea Jezuchea SAT utracher ami zaite pavtt nihall korit aileanv. Xub-vortoman Ankvar Marien ucharlolim thoddinch utram amche mukhar dovorta. SAT pavtt Maria, Jezuchi avoi uloiloli mhonn ami chearui Xub-vortomanancher vachtanv zalear, tinnem ucharlolim sovuch utram amche mukhar dovorleant; satvem utor kitem tem Xub-vortoman borovpean amkam sangunk na.
Bhagevont Lukas zaka Mariecho xubhvortomankar mhonnttat kiteak Jezuche avoi vixim mahiti chodd xi tachea borovpantlean amkam mell’lta Marien ucharlolim chear utram amche fuddem dovorta.
Poilem utor: Boddvo Gabriel tika Soddvonddarachi avoi zaunk Devan vinchun kaddlea mhonn sanglea uprant Maria boddveak
munntta, “Mhaka dadlea lagim sombond na mhonnttoch hem koxem ghoddtolem?” Aplem jivit ankvarponnachea bhesar Devak bhettounk tinnem ievjil’lem mhonnttoch Devachi ievzonn konn porim purn zatli, hacher ti vichar korta. Mariecho bhavarth Devacher, Tachea utracher kurdd’ddo bhavarth nhoi. Boddvean Devacho nirop haddla tacho porinnam somzun ghevpacho yatn ti korta.
Dusrem utor: Mariechem dusrem utor “Hi asam hany Sorvesporachi chakorn: zaum mhoje sovem tujea utra pormonnem”. Him utram Marien ucharlim jedna boddvo tika sangta ki hem kam – monnghe Soddvonnddarachi avoi zavop, dadlea lagim sombondh korinastana eka ballkak aplea kusveant haddop – soimbachem nhoi punn Povitr Atmeachem, karann Devachean korunk zainam toslem kainch na. Devache khuxi pallunk, Tachea utracher ghott visvas dovrunk, Devak sodanch “Hôi” mhunnonk Maria amkam xikoita.
Tisrem utor: Marien ucharlolem tisrem utor amkam lipun urlam. Boddvean Elizabet tiche mavxe bhoinnichi khobor sanglea uprant, Sorvesporan zanntte piraier eka bhurgeachem dennem tika favo kelem mhonn kollit kelea uprant Maria aple mavxe bhoinnichi seva korunk Judachea nogrant doddvoddan gheli. Bhagevont Lukas amkam sangta tea pormonnem Maria Elizabetik “noman” korta, punn koslea utramnim noman korta tem amkam to sangona. Tichea nomanachim utram aikona fuddem tichea kusveant aslolea ballkan uddi marli mhonn sangta.
Chovtem utor: Soddvonnddarachi avoi zaunk Devan vinchun kaddlole ostorek, Ankvar Mariek polleun zannt’ti Elizabet Povitr Atmeache sfurten Mariechi tust korun mhonntta, “Ostoriam modem subhagi tum, ani subhagi tuje kuxichem foll”. Punn Maria Sorvespora Devachi tust korun aplea kallzachim bhavnnam, Devachi kaklut ani konvallai, tachem visvaxiponn, tachi opurbai lhanam ani dolldiream sovem: hea sobit ani orthabhorit utramnim udgarta mhonnun, “Mhozo otmo Sorvesporak vakhannta…..”. Amcho Dev sobar kuddi-otmeachea denneamni amkam bhorta mhonnttoch Marie baxen sodankal Devache upkar ami attounk favó.
Panchvem utor: Mariechem panchvem utor amkam mellta jedna ticho put Jeruzalea xarant porbe somoiar sanddta. Khontibhorit zaun Jezuchi avoi ani bapui aplea putak xezaream-soiream modhem
sodhun-sodhun porte Jeruzaleachea Devmondirant pavtat, ani thoim
kitem ghoddta tem ojeap zaun polletat: bhurgo Jezu xastriam modem bosun tanchem aikotalo ani tankam vichar bi kortalo. Tedna tachi avoi taka mhollem, “Puta Tunvem amkam oxem kiteak mhonn kelem? Polle, khonti-huske kaddun tuzo bapui ani hany tuka sodtaleanv” (Lk 2,48). Ani Jezu, ho bara vorsancho bhurgo, aplem karya kitem tem bhes bhor zanno also dekhun, tankam zobab diun mhonntta, “Tumi kiteak mhonn mhaka sodtaleat? Mhojea Bapachea ghorant hanvem asunk zai mhonn tumi nokllo asleat? To uloilam tem tankam somzunk na mhonn xubvortmankar rokddoch amkam sangta
Sovem utor: Mariechim nimnnim don utram Juanvanchea xubvortomanant amkam melltat.
Juanv dusrea avesvorant Cana ganvant eka logna somoiar kitem ghoddlem tem amche fuddem dovorta. Jezu, tachi avoi ani tache xis tea lognak hajir asle. Jezu atam ek bhurgo nhoi punn tis vorsancho ek tornatto zaka ganvcho lok “tovoiacho put” mhonn vollkhotalo. Jedna lognachea somarombhant auchituch tancho soro sompta ani haka lagun to ghorabo lojek sampddonk xokiata asa tedna Maria, ek huskean bhorloli avoi koxi, aplea putak tanchi avgodd poristhiti jahir korun mhonnt’ta, “Tanche lagim soro na”. Punn Jezu apli avoi sangta tem kanar ghena so dista jedna to mhonnta, “Ostore, tuka ani mhaka hem kiteak poddlam…?” Osle avgodd poristhitint tichim utram, tichi vinonti aplea Putak amkam sangtat ki Maria dusream sovem vhodd huskean bhorloli ostori mhonn.
Satvem utor: Ani atam Mariechem nimannem utor amkam mellta. Maria, hi Sorvesporachi chakornn (Lk 1,38) tea ghorabeachea chakrank lagim sorun tankam mhonnta, “To tumkam sangit titlem-i tumi korat”. Aplo Put koslem tori ojeap korun tea ghorabeachi loz pois kortolo mhonn tika ghott visvas aslo, okhondd bhorvanxeachi ostori ti! Dor ek disa zaiteam avgoddaiank ami fuddó korunk poddta ani hea Novea Vorsant amche bolaike vatten, amchea ghorabeant, somajik mollar tore-torechim ahvanam amche mukhar ubim zatlim hantunt dubhavuch na, punn ek mat khorem: ami eksurim nant, sorguinchi Avoi amche sangatak asa, hea sotacher amche lokx dovrun ani Mariechim heam utram, “To tumkan sangit titlem-i tumi korat” pormannem amchea jivitachi panvlam marit zalear kaim huske kaddinastana ami hea vorsant amchi yatra fuddem vhorunk zatli.
(Fr Anil Kumar)