TADEV:Dev boro dis dium,Simao Titiv.Itlo ghosghoxeanim pavs poddta astanaim,tum khoim vochunk bhair sorlai?
SIMAO:Baba Tadev,pavsant vo votant,amchem dispottem jivit fuddem vochunk zai nhoim? Bazarant vochunk bhair sorlam.
TADEV:Rosteancher kitlem udok vhanvta nhoim?
SIMAO:Oi,tem babddem pavsachem udok khoim mhonn vetolem?Pavs tor itlo thambonastana poddot asa.Soglea vallanim(gutters) plastic bottli,tore-torecho mell ani mati bhorleli assa.Pavsa adim amchea Nagarpaliken sogle vall durust korun,nitoll korunk zai asle.Oxem ghoddlem nam dekun ho porinam.
TADEV:Nagarpalikeche kamdar,thodde dis adim hem kam kortale tem hanvem dekhlam Titiv.
SIMAO:Sarkem tujem.Tannim ieun zaito mell,mati kaddli khori punn ti tannim rostearuch dovorli ani rokddoch pavs suru zalo ani to mell ani mati portun vallanim ghelo.
TADEV:Koslem bezababdarechem kam tanchem?
SIMAO:Dor vorsa,oxench ghoddta.Nimnnea vellar,he kamdar dixxti poddtat ani tanchem kam omtea kollxear udok -oxem zata.Itlench nhoim,hea vorsa Bizle khatean (Electricity Department)margar aslelea vhoddlea zhaddançhe khande katorleat, addkholl zainam zaunk.
TADEV:Tannim hem borem Kam kelem nhoim?
SIMAO: Katorleat tem borem Kam,punn te katorlole khande zaite dis thoinch poddun asle ani tantuntle thodde vallanim poddle.
TADEV:Ai Saiba..tankam vichartolo konn nam,Titiv?
SIMAO:Zaite asat,punn atanchea kallar ap-aplem kam bore ani zobabdaren kortole mhonis bhov thodde.Sogle svarthi zaun poddleat.Mhaka kiteak poddlam…oslo tancho sobhav.Lokachea boreponna khatir konnuch chintinam.
TADEV:Tanchim bollsam bhorlim mhonntoch zalem.
SIMAO:Kosle mhonn lokache vollvolle?Thodde roste ani sorvbountim aslolim xetam -bhattam buddun thoddeanchea ghoranim udok bhorlam.Thoddea zageancher vahatuk(traffic)bond korun dusre vatten vechem poddta.Pul pasun moddon gheleat.
TADEV:Xetkareank kitlem nuksaan zalam tem polloun vaitt dista..bhongom babddeanchem.
SIMAO:Thoddeanchim ghoram moddun zaiteancho jiv passun ghela.Churchure tanche.
TADEV:Sorkar tankam sogleank modot kortolo mhonn jahir kelam.
SIMAO: Sogleank favo to adar favo zalear puro mhonn axa dovrumia. ani toxench meleat tea bhavam bhoinnank sorginchem sukh ami magumia.
TADEV: Oxench ghoddon ieum,hech mhoje anvdde.Borem vetam hanv.Titiv tum sintidan voch.
SIMAO: Borem TADEV,. mog asum.
Felix Dias