Tadev: Dev boro dis dium, Simao Titiv. Hatant poti-ba gheun khoim vochunk bhair sorlai?
Simao: Tukai dium baba Tadev. Hanv Moddgonvam ferient vetam. Purumentachem Fest, aitara-dis ghonnghonnan zalem ani tea nimitan thoim fer asa ani ek suman bhor ti asteli.
Tadev: Purumentachem fest? Hanv somzunk nam.
Simao: Hem, Povitr Atmeachem fest vo Porob Moddgonvche “Holy Spirit” Igorjent vhodda ghonnghonnan monoitat. Hea nimitan thoim Igorjelagim sorv-bhonvtonnim fer ghaltat ani zaiteo vostu , zoxem mirsango, sukloli maslli (zoxe sungttam, solve je agullem ani morieche astat, bangdde, adi) jirem, sambar ani dusreo randpacheo vostu. Atam rokdoch pavsacho kall suru zatolo ani lok hangasor heo vostu gheun fuddlea 2-3 mhoineank toiari koxi kortat ani hakach lagun hea festak, Purumentachem Fest mhonntat.
Tadev: Atam sozmolom. Hem Goyant ekuch fest?
Simao: Nam anikui asat zoxem Mapusa, Quepem ani ier thoddea ganvanim zatat.
Tadev: Heo vostu gheunk vetanam, zaiti gordi zata asteli. Tor thoim vostu sovai dhoren melltat?
Simao: Nam Tadev, sovai khoinchem? Atam sogleak margai vaddlea. Adlem soglem ghelem, bexttench Feriechem nanv. Ekuch faideachem tem soglem ekach zagear gheunk mellta. Ek adleanchi porompora ti.
Tadev: Dusreo vostu vikunk dovortat astele nhoim?
Simao: Oi ani zaiteo vostu astat zoxeporim chonne-bhiknnam, mittai vo kaddi-boddi, fulam-zhaddam, kopdde, moderacheo vostu, bhurgeanche khell ani ier zaitem. Jevnnacheo ani pievpacheo vostu pasun astat.
Tadev: Lokak movjen vell sarunk ek bori sondhi.
Simao: Zaite pavtt pavs poddun tankam luksann sonschem poddta. Tem polloun dukh dista.
Tadev: Hi fer kitle dis asta?
Simao: Kaidean ek suman bhor ti asta punn te vepari uprant modot vaddoun anikui dis bhostat.
Tadev: Hi fer rosteancher ek addkholl-xi zata asteli nhoim?
Simao:Oi hem khorem ani hakach lagun sogle odhikari vaurtat vahatuk (traffic) – ak addkhol zainam zaunk.
Tadev: Sogleamnim sohokar diun bore bhaxen hem fest sobounk zai.
Simao: Oxench zaunk magum-ia. Borem tor vetam hanv. Magir gormi vaddteli.
Tadev: Boro korun voch.
Felix Dias