Tadev: Devache kurpen bhorlolo dis tuka anvddetam, Simao Titiv.
Simao: Tuka-i anvddetam Baba Tadev. Zaitea kallan ami meutat nhoim? Tumi sogllim borim asat mhonn sozmotam.
Tadev: Ami asanv borim. Hanv thoddo kall Goeam bhair gel’lom, taka lagun tuka mellonk vell mellunk nam. Tum koso asa?
Simao: Hanv asam boro, punn hea disamnim bhirantin dis sarche poddtat.
Tadev: Kosli bhirant Titiv?
Simao: Rosteancher kitle-xech obsoeg ghoddtat. Roste surokxit nant. Tea bhair kitle khun ani maramari. Ghorant ravonkui suseg asonam, zalear rosteancher bhonvonkui surokxa mellonam.
Tadev: Sarkem tujem. Atam Armam (Pistol) passun gheun akromonn korunk lagleat.
Simao: Adim ami oslem kainch polleunk nam. Kai bore xantin ami dis sarle.
Tadev: Tea bhair desam modem zhuzam thar dinant.
Simao: Ukraine ani Russia hanchem zhuz azun chaluch asa ani atam Israel ani Hamas – Palestine zhogddunk lagleat.
Tadev: Oi, kitlo innocent lok guneanv nastanam mortat… kosle voll’volle sonstat.
Simao: Churchure babdeanche. Hospital-acher pasun bomb uddoun soglem nisontonn korun soddlem.
Tadev: Hem zhuz veginuch bond zalear puro mhonn Deva lagim magum-ia ani meloleank Sorginchem sukh anvddeum-ia.
Simao: Oi ami khotkhotean magunk goroz. Kitlo nas zata tem polleun bhirant ani kampero sutt’ta.
Tadev: Sogllea Santam – bhoktancho ani meloleank bhettoilolo dis lagim pavlo nhoim Titiv?
Simao: Hea disamnim simiter-int safai chalu asa. Sogllea meloleam passot magtanam ami amcheai pasost magonk goroz. Konn zannam ami mortokoch amche passot konn magot vo nam magot.
Tadev: Sarkem tujem Titiv. Amchea jivitachi ami sodanch ek molavnni koxi korun sodanch borem tench korun jivit sarunk ekdom gorjechem. Konnakuch aplo vell kednam ietolo ani Devacho avaz kanar poddtolo tem khobor nam.
Simao: Kai bore vichar tuje, Tadev. Amcho vell kednam, khoinsor ani koso ietolo, tem fokot amcho sorgincho Bap zannam. Hakach lagun hea disanim Misar vachpam amkam acho ugddas kortat.
Tadev: Ami sodanch toair asunk zai mhonn amkam xikoilam ani tem mhojea monant asa.
Simao: Ekdom bori vost Tadev. Oxench soglleamnim chintunk goroz. Devan hi kurpa amkam sogleank favo korunk amchim magnnim chaluch dovrum-ia.
Tadev: Devan amchim magnnim aikolear puro. Borem titiv, vetam hanv. Mog asum.
Simao: Boro korun voch.
-Felix Dias