Mogall Firgozkaramno,Mogall Firgozkaramno,Hea vorsa Pap Saib Francis hannem korezmacho sondex diunk ‘Thoko-nastanam borem tem korum-ia, kiteak borem korchem soddun dinanv zalear, tachem pik vell pavtoch amkam melltolem.’ oxem Gal.6/9 he vollicho adhar ghatla.

Covid 19 ani tea uprant ghoddlolea zaiteam ani ixeob nasloleam adkollim, goribsann, mornnam ani atam zhuzam modem Kristi jivitachi borem korun govaiki diunk Pap Saib Francis magta. Heam fattleam don nistur vorsam modem mon’xachem jivit khub avgodd zalam. Chintunk zaina tosleo adkolli ieun ubeo zaleat. Oxem ghoddta astanam monxallo sobhav odik disunk amkam ekdom gorjechem. 

Korezmacho kall mhollear odik borem monisponn dakhounk ek soglleank boro soeg. Korezmant tin (3) vostu odik korunk Kristi mon’xam vavurtat. Teo mhollear odik magnnem, prachit ani udharponn korunk porot porot ugddas korta. Amkanch unnem korun prachit kortat ani dusreanchem chintun udharponn dakoitat.

Prachit kortanam dor ek monis aplea bhagevontponna khatir vavurta. Aplea jivacher (chintop, ulovop ani kornneo adharop) control gheta. Prachit korop mhollear apleakuch nam mhonnop. Hem ek ekdom avgodd  kam. Goroz nam mhollear amkam zaitem uloum dista. Boslole suvater kitlem xem borem ani vaitt monant ghollta. Eklo aslele suvater kitlem xem pollounk zata. Jibechi ruch vaddta. Dolleanchi axa sompoch nam. Hem sogllem control korunk ekdom avgodd. Karann jiv ani kudd zata titlem borem ani sompem jivit sodta. Kitle sogott sant-bhokt apleacheruch zhuzunk koxttovtale. Punn tannim tem zoit vhelem.

Dusrem mhollear udharponn korop. Hem zaite baxen dakhounk zata. Fattlea vorsant zaitea lokan gorjek poddloleak udharponn kelam. Jevonn, udok, ghor, sirvis, piddestank ilaz, vokdam ani hannim aplo usko dakhoila. Thoddeamnim aplea lagim nastanam dusreank dilam. He baxen Bhagevont Paulu Galieskarank mhonnta  tem ‘borem korunk  kednanch thoko naka’ amche sovem khorem zata.

Covid 19 ghoddie atam rokddench somptelem. Sogllem somajik jivit ghoddie porot normal zatelem. Ani borem korunk soeg ghoddie unne zatele. Punn borem korchem kednanch sompchenam. Korezm sompun Paskancho kall ietolo. Punn amchem borem korchem sodanch chalu urum-di.

Borem kelolem kednach nirfoll zaunchem nam. Amkam tacho foll khoim tori ani kednam tori dixtti poddtolo ani sorginche vatter faido zatolo.

Soglleank tumkam kuxalborit Paskanchi porob anvddetam.

Tumcho Vigar,
Fr. Andrew Pereira