Apovnnem tin (3) bhaxen asunk zata, Kazari jivitak, ankvari jivitak ani dhormik jivitak. 99 % lok fattim-fuddem polloinastanam kazar zata. Thoim legun kazari jivitak apovnnem asunk zai. Ek boro avoi/bapui vo boro ghov/bail zaunk ek dennem Devachem. Dusre bhaxechem apovnnem mhollear atam-atam zaitim zannam sodun ghetat tem mhollear ankvari jivit sarchem. Haka novoch nett mell’la, karann zaitim zannam, odik korun cheddvam sirvis kortat ani tim konnacher poddun nant. Tisre baxechem apovnnem mhollear adinch thaun asa ani tem mhollear dhormik apovnnem. Hanga gozal kortat ti fokot dhormik jivitachea apovnneachi. Haka chodd korun ami apurbaien “Dev apovnnim” mhonntanv. Konnui eklo cheddo, padri vo cheddum, madr zaunk ieujita. Tankam aplem apovnnem sodun kaddunk favo to adhar diunk zaiteo suvato asat.
Dev Apovnnim zaite bhaxen ek-ekleak ietat. Chodd korun tim mon’xam vorvim ietat. Thodde pautt ghoddnea vorvim, ani kednaim aplech ostongim. Konnui ekleak Dev apovnnem asa mhonn zaite pautt tanchea sobhavacher vo vagnnukecher disun ieta. Tednam anik konn eklo taka hi khobor sangta. Dekhik: Bhagevont Inas de Loyola hannem Francis Xavier-ak tench, tench sangun tachem mon bodol’lem. Vo konnui tornatto/tornattem dusreak polloun aplo nomunno koso gheta ani apleakui tache baxen zaunk proitn korta. Atam halinch iskolamnim vo igorzamnim vocation promotion mhonn zaite program zatat. Kariavolli korun, zaiteo goxtteo sangun, sports program korun, camps korun bhurgeank oddun haddtat. Tankam Devachi ani zaitea santam-bhoktanchi khobor sangun umed ditat.
Thodde pautt vaddloleank aplea jivitachea ghoddnnea vorvim vo onnbhova vorvim apovnnem asa mhonn disun ieta. Bhagevont Inas de Loyola zhuzant zhuztanam tachea paim-ar nalli poddun ghaiall zalolo. Tednam to zaite dis hospitalant urlo ani kaim onnbhovank lagun Jezucho pattlav korunk laglo. Bhagevont Francis Assisi tosoch zhuzak ghel’le kodden vatter ranant ujeant xirkolo ani apleak Devan vattailear aplem jivit Jezuk bhettoitolo mhonn angvonn keli.
Apovnnem mhollear English baxen mhonnum-ia “The courage to take a risk for God’s promise.” Hea apovnneant Dev zaitem basaita ani tem amche koddlean Aple porjek pavo sarkem korta.
Padrink ani madrink-uch nhoi, punn soglleam loukikank apovnnem asa. Aiz chodd ani chodd lok hem mandun gheta. Jezuchea vavrant zaito loukik khand martat. Taka ami “Lay apostolate” mhonntanv. Somazant koslem-i kam (profession) korum. Punn teach kamantlean Jezucho vavr korunk zata. Ho vavr Igorjent vo Igorje bhair legun korunk zata. Hem-i ek kherit apovnnem.
Oslim apovnnim zonn eklean ollkhun gheun Jezucho vavr fuddem vochunk sohokar dium-ia.
Tumcho Padr Vigar
Fr. Andrew Pereira