Covid-19 vo sadhea utran Corona virus, mhonnlear azun jivar koddkoddo ieta. Unnem zaunche suvater amchea Bharotant hem odik choddot asa. Disak 1200 Covid-an lok morot asa. Oslea vellar fattlo il’lo ugddas kelear amkam odik faideachem zatelem xem mhaka dista.
Italy desant jednam Covid-19 pavlem tednam March 27, 2020 disa tancho soglleam von chodd (maximum) lok 921 eka disa melo. Tache adim he birankull Covid piddek lagun lok morta mhonn Pap Saib Francis hannem lokak ghottai diunk ani Deva koddlean pekovnni magun Mars-ache 28ver, 2020 ek magnneachi sanz dovorli. Te sanje Pap Saib, St. Pedru-che Basilica mukhar ekloch pausant bhizot cholun ailo ani eka adlea/pornnea khursak gheun magnnem kelem. Ho bhov povitr khuris Roma-cho Sant Marcello he Igorjent aslo. Hech Igorjek ek pautt adim uzo laglolo punn hoch khuris ojeapanim vattoulolo. Sangtat ki adim anik ek pautt 1522 vorsa, Roma xarant pidda ail’li tednam hoch khuris gheun lokan pursanv kaddlelem ani tea uprant Roma xarachi tea kall-a voili pidda bori zaloli.
He-i pautt toxench zatelem vo nam kai mhonn zaitim zannam ghoddie tellun polleta aslim. Thoddeanim ghoddie hem Pap Saib ek magic koxi korunk sodta vo ‘photo ops’ korunk sodta kai dislem astelem. Tea disa hanvem TV ghatli ani bhieun punn bhavartan lhan pekovnne pasot magnnem kelem. Tea uprant ghoddie soglleanim tacho ugddas soddlo ani Bharotant steel tattam vo handdio daddavun GO CORONA GO mhonnun bob marli asteli. Tea uprant ghora mhukar divleo pettoileo astoleo. Punn amcho Corona azun vochona, punn odik ani odik chodd zait asa. Hozaramnim lok voll-vollun ani goribsannik pavun morta.
Italy, 27ver Mars, hea disa tancho sogllea von chodd lok melolo. Ani Pap Saibachem magnnem 28ver Mars zalem. Tache uprant Italy-k mornna kednach vaddunk nam. Portench zalear unnem zait ghelim ani aiz (28th Sept) ho lekh boroitanam fokt 17 lok melolo. Bharotant aiz (28th Sept) 1200 lok mela.
Vhoili ghoddni kitem tori xikoita. Dev ani bhavart mhonnta to azun jivo asa ani dhormik mon’xam ani kornnea vorvim azun dixtti poddta. Pap Saib Francis ani Goy-cho Bisp amche lagim anik ek pautt adle sonvoim pormannem hea Otumbrachea mhoineant Ters-achem magnnem korunk magta.
Bhurgim school-ak vochonant. Zaito lok bekar zaun ghorant bosla. Zaite pautt kaim korpachem nam dista. Khoim vochunk-ui mellonam. Igorzo azun ugtteo zaunk nant. Ugddas dhorat, “There are no spiritual holidays”. Ghorant ravun anik kitem tori korunk zata. Otumbrache 7ver Ruzai Saibinnichi porob. He porbecho itihas oso asa. Byzantine Empire staplolo tednam Kristanv ponn fankarlem. Punn tache uprant musolman Ottoman Empire staplo. Kristanv lokak marun kobar kortale vo tankam musolman kortale. Tednam Italy mainland ani Sicily modem Lepanto somdirant 1571 vorsa mott’ttem zhuz zalem ani thoim Ottoman emperor hache foujek haroili. Zhuz jikunk mott’ttem karann mhollear akhea Europe-ak tersachem (Rosary) magnnem choltalem. Hea zhuzachea zoitachea vorsa somoiar Saibinnicho tenko ani tersachea magnneacho faido mhonn ollkhun Pap Saib St. Pius VI-an Ruzai Saibinnichem fest Otumbrache 7ver tharailem. Ters-achem magnnem legun korun zhuz-ant zoit meulolem asa. Amchem sonvsari ani otmik zhuz chaluch asa. Hem zoit mellunk amkam Ters ekdom gorjecho. To ghorant famili borobor chukoinastanam aplea ani dusream pasot korum-ia. Odik korun hi Covid-19 pidda pois zaunk Saibinnicho adhar magum-ia
Tumcho Padr Vigar
Fr. Andrew Pereira