Otumbr-ache 22ver ami Dhormporgottnecho aitar somorombhtanv. Dhormporgottnecho aitar mhollear amchea dolleam mukhar fokot calendar, envelopes ani toxench aitarachea dhormdanamcho ugdass ieta. Punn khoro dhorm porgottop mhollear kitem, tem ami visortanv. Dhorm porgottop mhollear, ‘Ak’khea sounsarak vochun Devachem xubhvortoman amchea bhavam bhoinnank porgottop’. Bhagevont Paulu mhonnta “Xubhvortoman porgottop mhollear mhaka vhoddvik nhoi punn to mhaka ek kaido, tem hanv korinam zalear mhojem kotta” – 9 kor, 16;
Amerike-chea desant ‘Morgan’ Nanvacho ek Anglican Pastor ani famad ‘Preacher’ asa. Sadhea utranim, lokachea kallzak lagta te bhaxen Devachem utor porgot’ta. Taka chear put asat, ani he tache put aplea Bapai bhaxen bore ‘Preacher’ vortovtat.
Ek dis tea char-ui putamcho T.V-cher interview gheunk reporters’ tankam mellunk ietat. Tanche familint sogleam poros boro ‘Preacher’ konn to tankam vicharta. Thoddea vellan, ogich ravun, tanche modlo eklo oso udgarta, “Amchi Avoi”. Interview ghetolo ani T.V.-cher Polletolo soglo lok tottak zata, karann soglim, zanno aslim ‘Morgan’ tancho Bapui, boreantlo – boro porgottnnar mhunn. Ojap zaun, ho interview ghetolo monis oso anink ek proxn korta, “Amchi Avoi, oxem tumi kiteak mhonntat? Tumche avoi-n Devachem Utor porgottlolem ami kednanch aikunk nam. Tednam te oxe zobab ditat, “Amcho Bapui ‘Morgan’ ani ami tache put, Devachem Utor porgott’tat, punn amchi Avoi ‘Margaret’, Devachem utor aplea jivitantlean jieun porgotta”.
Devachem utor porgotunk bhov sompem ani oslim porgottnnaram sonvsarant zaitim asat. Amchea Goeant, utram vorvim dhormporgottpi zaitim asat. Amche modlim zaitim zannam tanchem aikunk vetat. Devachem utor jivitant jieunk ani kornneantlean vevharant ghalunk bhov avghodd. Punn oslem jivit jietelim bhov thoddim amkam melltat. Dekhik, Kolkatachi Bhagevont Mother Theresa, Ballka Jezuchem Bhagevont Teresa ani tichi Avoi ‘Zelia’ ani Bapui ‘Luis Martin’, Bhagevont Jose Vaz adi.
Bautizm-a vorvim, dor eka Kristi bhavarteak, Jezu amonntronn korta ‘Ak’khea sounvsarak vochat ani sogle rochnnek xubhvortoman porgott korat’ – Mk 16, 15; ‘Tumi vochat ani Bapache ani Putache ani Povitr Atmeache nanvim tankam Povitr snan diun – Mhoje xis korat’ – Mt 28, 19-20.
Padr – Kur
Fr. Gregory Cruz