Gonvllik Firgoz Sobhecho Mhozo Onnbhov
Gonvllik firgoz sobha zaun asa ek pul firgozkaram ani firgojent vavurtolea yadnikam sovem. Amchea somudayanim amchea sonvstha-nim jem kitem ghoddta tem somuday-eche fuddari vo sonvsthecho protinidi gonvllik firgoz sobhechea zomatik firgoz gonvlliank kolloita ani gonvllianchio firgoje pasot kitem yevzonneo asat teo somudayechea fuddariam vorvim firgojkarank pavoita. Gonvllik firgoz sobha nem’kaide korina, te ek ‘consultative body’ suchna korta. Nem kaide firgoz sobhecheo borio suchna gheun Firgoz Gonvlli kortat ani te pallunk Gonvllik Firgoz Sobheche vangddi adar ditat.
Amchea Sant Sabastianv firgojent Gonvllik Firgoz Sobha staplear sumar ottra vorsam zalim ani pondra vorsam passun hanv tatunt vavurtam. Zaum somudayechem fuddari, zaum sant Vincent de paul hacho president koxim firgoz sobhent hanvem vavr kela. Ek term hanv Vice Moderator aslim ani Moderator naslo tedna ti-i zhuddtti choloilea.
Hea mhojea pondra vorsamchea onnbhovan hanv zaite vatten girest zaleam. Povitr Sobha ani ticho vavr kitem, hem mhaka somzun ailam.
Gonvllik Firgoz Sobhecho vavr fuddem vhorunk titlem sompem zaina. Punn jem kitem ami kortanv tache vorvim Jezuchi bori khobor ami porgott’ttanv mhonn anond bhogta. Gonvllik Firgoz Sobheche zomatik chukoinastana ani vellar hajir zaunk, amkam vavr basaita to korunk oddchonneo astat.
Kuttumbacho vavr korcho korun hanvem ho Povitr Sobhecho vavr mogan kela. Ho mhozo vavr kortanam mhojea ghorcheancho mhaka khub sohokar mell’la, tannim kosleoch addkolli ghalunk nant. Mhojea jivitache dekhi vorvim hanv mhozo gonvllik vavr ani zobobdari bore bhaxen pallunk vavurleam. Ho Firgojecho vavr mhaka mhozo ghorchoch vavr koso zaun gela. Hea vavra vorvim mhojea jivitant hanvem zaito Devacho mog onnbhovla. Devan mhaka ani mhojea ghorcheank zaitea denneanim ani besanvamnim bhorleant. Hanv mhojea ‘zone’-achea sogllea familink nanvan ollkhotam ani tancho mhaka bhorpur adhar, sohokar ani mog mell’la, Hem firgojechem kam fuddem vorunk.
Atam toddeach kallan novi Gonvllik Firgoz Sobha ghoddun yeunchi asa. Bore vangddi vinchun yeunchi ani tache vorvim amkam Devachea mogachi ani firgojechea boreponnam khatir vavurtolim Gonvllik Firgoz Sobha mellunk hanv magtam.
Eudecia Vaz
Vice Moderator – Parish Pastoral Council