8ver Setembr-ache Ankvar Maiecho zolm dis ami somorombtanv ani tea disa ami kherit bhaxen soglleam avoi-ancho ugddas kortanv.
Hea vorsa, Setembr-ache 8ver 2023 ami Legiao Marie Aquemcho zomo Saude Saibinn, Marieche porbek toiar zatanam nov dis amchea dotonichea bhurgeamnim ani Dev Sondexkaramnim mandavoll keli ani Legionachea vangddeanim sanjechea Misa uprant dakttulem canteen kelem ani tachi ji ienavoll asli (profit) to borea vaurak dilo. Porbechea disa sokallim 6:45 voramcher ani sanjechea dobajik Misachi mandavoll Legionachea vangddeamnim keli ani to dis khuxalkaien sarlo.
He porbechi khuxalkai vanttunk ami Setembr-ache 10ver, Nazareth Home for the Aged, Navelim, Salcette-Goa, hea zantteam avoi-am sangata sarlo. Ami sumar 29 Legion-anchim vangddi hazir aslim ani amchea ganvcho Padr-Vigar ani amcho otmik guru Fr. Andrew Pereira amchea vangdda zantteanchea ghorant hajir aslo.
Ami thoim 11:30 voramcher pavun sorlim ani ami tankam dekhlim tednam tim amchi vatt polleun aslim ani amkam polleun khub khuxal zalim. Tanchea voddilancho Superior Sr. Anserine D’Souza ani her hajir aslolea madrin-cho amkam boro ievkar mell’lo. Ami tea sogllea avoi-anchi khobor ghetli ani tanche kodde mogan uloilim. Amkam tannim aple zannvaiechim don utram sanglim ani apli khuxalkai porgottli. Ami Legion-achea vangddeamnim dakttuli kariavoll keli. Poilim ami Ankvar Mariechim gitam gailim ani tea uprant Konkani manddo gailo. Amchea vangdda tinvuim sogllim gavunk laglim ani zaiteanim kantaram gailim.
Superior Sr. Anserine hinnem aplea kallzant thaun Padr. Vigarak ani amkam dhinvaslim kiteak ami hea avoi-ancho ugddas kelo ani tanchea sangata amcho moladik vell diun sarlo dekhun. Tinnem mhonnlem ‘hi ek bori korni amchea hea Aquemchea Legion-aramchi zannim aplo husko hea avoi-ank dakhoilo’.
Sumar 12:30 voramcher ami Mother’s day Celebration mhunnon tanchea sangata cake katorli ani soglleamchim tonddam ghodd kelim ani gaion kelem ‘showers of blessings’ ani uprant Fr. Andrew-n jevnnacher axirvad ghatlo. Tim sogllim aplea jevnnachea mezar boslim, khuxalkaien ani mogan vaddlelem jevonn Devak dhinvasun tim jevlim. Uprant ami sogllim tanchea vangdda jevlim ani oxe toren ami amcho avoi-ancho dis vhodda mogan ani kallzache khuxalkaien sarlo.
Jeanivie Da Costa
Legiao Marie – Odheox