Mogall Firgozkaramno,
Dhondekar mhonntat, “Akhea vorsa bhitor Dezembr mhoineant sogllea von chodd giraik zata.” Khorem mhollear sarkhem tanchem. Hem dusreank vicharpachi goroz nam. Karann zonn eklo apunn kitlo khorch korta tednam tacheruch kollun ieta.
Dezembr mhoino sogllea Kristi lokak ekdom kuxalkaiecho. Jezuchea zolma vo natalam somoiar borem-borem nhesun, borim jevnnam korun, ixttam ani soiream borobor ekthaim zaun tim natalanche dis sartat ani somorombh kortat. Ekdom borem. Hachea borobor lhan bhurgeank ani vaddleleank legun tore-torechim danam ditat ani ghetat. Zaite pautt tantunt “surprise effect” legun samballun dovortat. Hantunt danam ghetolo-i ani ditolo-i kuxal zata. Bhurgeank zalear atam sarkhich sonvoim zalea. Vad’disa somoiar hatant kitem tori gheun bhitor sorchem poddta. Nam zalear bhurgem rokddench vicharta, “what gift you brought uncle?” Tea pasot bhurgeache ani ghorcheanche lojek tori lagun vhodd nhoim zalear ek lhan vost tori hatant gheun bhitor sorchem poddta. Tem gift tujean viktem haddunk zata vo nam, tem anink pollounk konn vochonam. Kednam thoddim gifts rotate zatat. Eklo kaddun dusreak dita ani tench gift dusro kaddun tisreak dita. Tem gift naka mhonnun vo dovrunk suvat nam mhonn hem zata xem dista. Dusre kodden kednam-i konn gift gheun ieta khoro, punn tache fattlean anik kitem goro (hook) ghatlolo asta. Dita 100 rupeanchem. Punn kaddun gheta 200 rupeanchem. Osle-i monis astat.
Eka girest mon’xak kitem mhonn gift vhorun ditolo? Tache lagim sogllem asa. Dita tem khub holkem distelem. Somaza nodren, eka gorib mon’xak kitem-i diunk zata. Amkam naka tem legun taka vhorun diunk zata. Apnnak konnem kitem dilem mhonn to kuxal zatolo ani tujea ghorant tem gift dovrunk suvat nam ani tem anik konnager vhorun pavoilem mhonn tum kuxal zatolo. Punn Lucius A. Seneca he baxen mhonnta “A gift consists not in what is done or given, but in the intention of the giver or doer.”
Hea Gonvllik vorsa Samariekar hachi vopar gheun “tum-i toxench kor” mhonn vixoi ghetlolo. Hea natalam somoiar konnak gift kitem diunchem tem polloun gheunchem. Samariekaran gorjek sampoddloleak bhiranti vinnem goroz tem kelem. Zokmi zaloleak aplea gaddvacher ghalun khannavollint vhelo ani tea vellar chodd gorjechem tem vokod ani jevonn-khann dilem. Hangasor ditoleachem mon ani ghetoleachi goroz ek sarkhi zali.
Hea natalam somoiar asa tankanch gifts diunchim nhoi, punn zache lagim kaim nam ani konnak goroz asa tanchem bi chintchem. He baxen amchea dhanank (gift) odik mhotv astelem. Devak odik mantelem. Teg udentiche Vidvan (three wise men) dhanam gheun Jezuk bhettunk aile. Amchi bhett osli orthabhorit zaum-di.
Tumkam soglleam firgozkarank kuxalbhorit natalam ani Devache kurpechem novem voros anvddetam.
Tumcho Padr Vigar
Fr. Andrew D. Pereira