Mogall Firgozkaramno,
Ap-aplea ganvchea askareachi porob lagim ieta mhollear soglleank ganvant kuxalkai bhogta. Vorsam fattim ghorant lhan bhurgeank vorsacho ek vistid vo kalsanv meuta mhonn jiv khuxal zatalo. Atam mhonn tuka mhoineak ek vo don tori xinvche poddtat, ani te bi tosleach somoiar ghalpache. Ganvchem fest mhonntoch soirim bhurgeank gheun thodde pautt don dis adinch ieun ravtalim ani fest zalea uprant don disamnim porot vetalim. Ferient bhonvunk mhonn mai-pai bhurgeank 2 vo 5 rupoi ditalim. Ani ghora portotanam chonneacho donno ani kaddeo-boddeo hatant dhorun nett’tan choltalim. Atam urleat teo fokot osleo adleo teo iadi.
Jivit kitlem mhonn bodol’lam. Ani tem kitlea nett’ttan bodolta. Fattleam 5 vorsam bhitor Bharotant lokachem jivit sarkhench vegllem zalem. Grestkai loka modem zaiti vaddli. Xikop bhurgeanchem vaddlem. Dor ganvamnim bandkama (constructions) choddlim. Bhurgim xikunk mhonn pois-pois dusrea xaramnim vochunk laglim. Vegllea dhormachea cheddea-cheddvam lagim odik logn zaunk suru kelem. Tantunt modem lok Portuguese passport korun bhurgeank sangata gheun England-ak vochunk bhair sorlo. Note-bandi (demonetization) zalea uprant dhondo sokla poddlolo to porot vhoir sorunkuch nam. Odik zalear azun sokla poddot asa. Serkar bi apleo naka zal’leo ani pottant kaim nam poddpa sarkheo goxtteo sangot asa. Lokam modem odik ani odik vegllochar ani dusmankai vaddoit ghela. Oxem astanam fuddar kitem zait kai mhonn mott’tte zobab naslole proxnn uprasot asat. Bhagevont Sebastiao bi bhov addkollim modem jielo. Tachea kallar chodd darunn ani o-dhormik mon’xam modem xipai koso Roma-k vavurtanam Sebastiao hannem Kristi bhavart apnnailo. Kristi bhavartachem jivit jielo ani bhiranti modem Kristi bhavart dusreank porgotunk laglo. Hakach lagun taka bhale topun marunk ganva bhair vhelo. Kalljidar Sebastiao mornnachea darar thaun porot ailo. Boro zalo ani Kristak porot porgottunk laglo. Oslea kamank lagun taka anik ek pautt marunk kaddlo. Bhagevont Sebastiao melea uprant legun addkollink ani akantak sampoddloleank adarak pavlo. He vattentlea Saxtti ganvanim zaite kodden Bhagevont Sebastiao patron mhonn kopelam asat. Sangtat ki heam ganvanim suru korun Colva, Chinchinim, Benaulim, Margao ani dusrea-i suvater pidda aili ani zaito lok mortalo. Lokacher bhirant ailoli. Oslea vellar Bhagevont Sebastiao hache mozotin ti pois zali. Azun lok Bhagevont Sebastiao hachi murti gheun pursanvam kaddtat. Soglli pest-pidda pois kor mhonn magtat.
Amchea hea kallar monachi pest-pidda ailea. Voita thoim dusmankai ani rag-krod nirmann kortat. Borem korche suvater sogllem vaitt zait voita. Bhavart/dhorm jietoleank legun suseg nam. Oslea vellar amkam Bhagevont Sebastiao ek okondd nomunno zata. Adkollim modem Kristi jivit jieunk adar dita. Tachi porob somorombhunk toiar zaum-ia. Adhar-sohokar ditoleank soglleank dhnvastam. Soglleank tumkam Bhagevont Sebastiao-chi kuxalborit porob anvddetam.
Happy feast to all.
Tumcho Padr Vigar
Fr. Andrew Pereira