Mogall Firgozkaramno,

Bhieun ani dhubavun fattlim don vorsam sorun ghelim. Punn atam sogllem tharear poddlolem koxem dista. Corona virus somplo vo bhovuch thoddo zalo kai dista. Sogllo lok novea monan ani mott’ttea nettan vavrunk suru zalolo dista. Zaum saiba sogllem anik ek pavtt tharear poddlear puro.

June suru zata tednam soimb legun sogllem novsorlolem dixtti poddtelem. Noveo kumbreo ani novem bim kirlololem zatelem. Veta thoim sogllem hirvem zatelem. Jivak legun sogllo sontos zatolo ani mon xant distelem. Kitli mhonn soimbant sobitai vaddteli. Sogllem rosroxit zatelem.

Zaitea borea vostum ani ghoddnia modem Igorjent legun anik ek kuxalkai zalea. Ani ti mhollear Igorjechi Cofre Committee novi staplea. Adle Committee vangddi he baxen asle: Treasurer Roy Rodrigues, Attorney Dean D’Souza, vangddi Theresa Dias ani Clifford Dias. Hancho ugddas kaddun hanv kuxal ani dukhi. Kuxal zaunk karann mhollear tannim fattlim tin (3) vorsam mott’ttea nettan zaito boro vavr kelo. Igorjeche moladik zage porot tabeant haddle. Goroz thoimsorlo poiso Igorjek apnnailo. Adleo vostu novsorleo/sarkeo kelo. Firgozkarank goroz te baxen sovloteo toiar dovorleo. Gorjevontank poixeam/jevnna adhar dilo. Akantak sampoddloleank gorjek pavle. Igorjek zaito revenue toiar kelo. Goroz tednam ikmot vaprun vavr kelo. Eka fattlean ek meeting korunk ani hanga thoim vochunk aplo zaito moladik vell igorjechea vavra pasot dilo. Mhonntoch ganvchea lokachea nanvan tankam kallzant thaun Dev borem korum mhonntam. Hanv il’lo dukhi bi zatam. Karann atam Igorjecho vavr korunk te mhoje vangdda adle baxen asche nant. Aplo vavr korun zobabdari bore baxen samball’li mhonn tankam soglleank xabaski.

Atam toch Igorjecho boro vavr chalu dovrunk (2022-2025) novi committee nemlea. Ti mhollear:

Treasurer – Alex S. Rodrigues,

Attorney – Clifford S. Dias,

Members – Sarita Fernandes ani Jason M. Cardozo.

Igorjecho sarkho unchlea pavddear vavr korunk hi tankam ek sondi (opportunity). They are the custodians of the Church’s property and assets. Igorjechea bhattancho, imarotincho, vostuncho ani poixeancho tannim boro samball korcho mhonn ho tancho mhukhi vavr. Hi novi committee hi sondi bore baxen ollkhun gheteli ani zobabdari pallteli mhonn soglleanche anvdde. Hi zobabdari tannim udhar monan ghetlea mhonn sogllim firgozkaram kuxal. Tumcher Devacho borpur axirvad poddum ani tumkam ani tumchea ghorcheank Dev aplea denneanim bhorum. Tumkam soglleank bori bolaiki dium.

Novem gonvllik voros suru korunk tumkam sogllea firgokarank nett mellum.

Tumcho Padr Vigar
Fr. Andrew Pereira