Mogall Firgozkaramno,
Chovis voram bhitor dis ani rat asta. Doriak sukti ani bhorti ieta. Jivitant sukh asa ani dukhui asa. Ek dis hanspacho ani ek dis roddpacho. Kednaim bolaiki vo kednaim pidda ieta. Hem sogllem ekdom gorjechem. Hantunt bhitor jivitachi grestkai liploli disun ieta.
Amchim kuxalkaiechim festam, dekhik natalam, novem voros, ganvchim festam, carnaval sogllim somplim. Rokddoch atam Korezmacho vo Prachit kall ailo. Hea kallant zaiteo motiam sarkheo boreo vostu amkam disum. Tantuntlem soglleam poilem ani borem tem mhollear amchench (zonn ekleachem) jivit. Ek lamb ani khol niall zonn ekleachea jivitacher. Hache von vhodd dennem anik nam. Jivita bhaileo soglleo vostu dusreanim kaddun ani chorun vhorunk zata. Punn aplem borem/vaitt jivit konnench vhorunk zainam.
Zonn ekleachea jivtacher niall korunk Korezmant zaite baxen soeg mellta. Te mhollear:
- Uskea mekllo vell- korezmant chodd-xeo, chodd kariavolli vo celebrations asona. Uneventful vell koso dista. Ogeponn odik dista. Zaite pavtt jiv khaunk ieta koso zata. Tednam aplea jivitant bhitor sorunk ekdom sompem zata. Oslo vell kednach ibaddinaka.
- Korezmacheo riti (Retir)- vell ani soeg mellta tednam retir korunk vell kaddun ghe. Don vorsam zalim Igorjent retir korunk mellunk nam. Punn atam online retir zatat. Mobile phone-acher pollounk melltat.
- Via Sacra (khursachi vatt) – tantunt 14 sthana gheun Jezuchea koxttancho ugddas ani niall kortat. Tantunt Jezu borobor zaitim mon’xam misoll zalolim, amcho eke baxecho, sobhav dakhoitat. Zonn eklo konn to ollkhunk mellta.
- Kumsar (confessions) – Covid-ak lagun Pap Saiban ani Goy-chea Bispan tanche podve vorvim zaitim otmik sompeponna dileant. Tantuntlem ek mhollear Aitar-sont Misak vochonastanam ravunk. Punn atam soglleank ek vaitt sonvoim zaun poddlea. Kazarank, party-ank, nach korunk, bazarant shopping korunk, soglleak vochunk zata. Punn fokot aitarachem Misak vochun lokak Covid zata. Don vorsam odik zalim astelim, zaitim zannam kumsarak vochunk nant astelim. He pavtt tori ontoskornachi chovkoxi korun borem kumsar korunk voichem.
- Doiall kornneo- sogllea dhorma bhitor doiall kornneo korchem mhonn xikoilolem asa. Korezmant ani ier disamnim legun kosleoi vhodd vo lhan tori doiall kornneo korcheo.
Challis dis somplea uprant anik ek pavtt Paskancho dis ietolo. Kuxalkai porot dixtti poddtoli.
Aiz St. Sebastiao-hachi porob. Kuxalkaiecho dis. Heach bhoktache mozotin sonvsarantli Covid pidda pois kor mhonn magum-ia.
Festachi soglli toiari ani manddavoll korunk adhar ani sohokar ditolea Parish Pastoral Council hachea sogllea vangddiank Dev borem korum mhonntam. Ani tancheach nanvan sogllea ganvchea lokak St. Sebastiao-hachi kuxalborit porob anvddetam.
Tumcho Padr Vigar
Fr. Andrew Pereira.