Fattlea mhoineant akhea sonvsarak zaiteo vhoddleo ghoddnneo ghoddleo. Thoddeo bhiranticheo, zalear thoddeo akantacheo. Sonvsarak zaiteam desant gormen ranam uzo pettun lhastat. Thoddea zageancher chodd paus poddun buddtti ailea. Zaitem luksann zalam. Hem odruxtt Goy-ant legun ghoddlem. Don vorsam Kerala ghoddlolem tednam, Goy-ant legun hench zatlem mhonn adim fuddem sangun dilolem. Hache vhoir niall kelear, heo soglleo ghoddnneo vattaunk proitn korunk zatalem. Punn zobabdari aslele monis konnuch korunk nokllot. Karann tantuntle chodd-xe xiklele nant. Afghanistan desant Taliban ieun desacho ani lokacho sogllo duspott korun uddoila. Soglleo xalla ani odik korun cheddvank xikpachem bond korun soddlam. Monisponnachem xikxonn nam, tea pasot hem sogllem oxem vaitt ghoddta.
Vhoili poristhiti polloun xikxannacho ani xikxokancho ugddas ieta. Setembrache 5ver “Teacher’s Day” mhonn monoitat. Khorem mhollear tea disa Sarvepalli Radhakrishnan, Bharatacho poilo Vice President ani tache uprant dusro President to zalo. Tacho vad’dis monounk suchoilem tednam tannem aplo dis nhoi, punn tea disa Teacher’s Day monoiat mhonn suchoilem. Apleacher soglleanchem lokx gheunche suvater tannem xikxokancho ugddass korun tanchem vhoddponn fuddem haddlem. Kitlo mahan monis to. Tache uprant Bharotache kitle President ani Vice-President zaun ghele. Zaiteanchim nanvam legit konn ugddas korinam.
Covid19 akhea sonvsarak zait thaun zaiteam vostum xikxannacho karbhar ani pod’dot bodol’li. Bhurgim xallek sompeponnim ietalim tim pois urlim. Bhurgeanchea avoi-bapaink ani odik chodd korun xikxokank soglle vatten motti addkoll zali. Survatekuch sogllo gondoll zalo. Konnuch kitem korchem ani koxem fuddem vechem tem nokllo zalo. Punn dis
ani mhoine fuddem ghele toxem il’lem il’lem chodd xem zagear poddlem. Hantunt sogllim, adlim mhatarim toxem novi tornattim teachers, eka-mekak sangat ani adhar diun bhurgeam pasot koxtt korun fuddem ghelim. Nimannea vellar tankam noveo-noveo xikoupacheo pod’doti xikcheo poddleo. Tannim aple rat asle dis korun xikoupacho vavr fuddem vhelo. Tankam soglleank xabaski.
Oxem mhonnlelem asa, “Teachers encourage minds to think, hands to create and hearts to love”. Aiz konnui ek bori mannsugechi teacher-icho ekuch hetu mholler toch. Aplim bhurgim aplea von vhodd zaunchim. Eke Teacher-ichean bhurgeak sogllem xikoun kobar korunk zainam. Punn ek bori ani huxear teacher bhurgeank xikpacho mog ani apnnem fuddem koxem xikchem tem xikoita.
Bharotacho anik ek khaltea ghoranneantlean xikun ekdom vhoir sorlolo President APJ Abdul Kalam, oxem mhonnta, “Teaching is a very noble profession that shapes the character, caliber and future of an individual. If the people remember me as a good teacher, that will be the biggest honour for me”. Ganvchea ani dusream soglleam teacher-ink, adkollim modem tumi xikxonnacho vavr boro thokos gheun, korun dakhoilam mhonn xabaski ditam. Ho tumcho vavr odik nettan ani xikoupachea mogan fuddem vochum. Tumchea xikoupachea vavran somaz odik boro zaum.
Happy Teacher’s day
Tumcho Padr Vigar
Fr. Andrew Pereira